“Səfirliyin nümayəndələri məhkəmə proseslərində iştirak ediblər. Faktlar təsdiq olunub, etiraflar mövcuddur. İttiham sübuta yetirilib. Belə olan təqdirdə ölkə ərazisində cinayət törətmiş şəxsin, hansı ölkənin vətəndaşı olmasından asılı olmayaraq, mühakimə olunması və cəzalandırılması Azərbaycan qanunvericiliyinə uyğundur”.
Bu fikirləri Musavat.com-a açıqlamasında hüquq üzrə fəlsəfə doktoru Çingiz Qənizadə bildirib.
Ç.Qənizadə qeyd edib ki, Fransanın 30 iyul tarixli bəyanatının məqsədi Azərbaycanın daxili işlərinə qarışmaq, hüquq-mühafizə orqanlarının işini şübhə altına almaq, eyni zamanda bu prosesi siyasiləşdirməkdir: “Martin Rayan haqqında hökm qanuni qüvvəyə minib. Görünən odur ki, Fransa diplomatik təzyiq yaxud xahişlər nəticəsində Apellyasiya Məhkəməsinin başqa addım atacağına ümid edib”, deyə o, əlavə edib.
Qeyd edək ki, ötən gün Fransanın Avropa və Xarici İşlər Nazirliyi Fransa vətəndaşı Martin Rayanın Azərbaycanda 10 il müddətinə azadlıqdan məhrum edilməsinə dair hökmün apellyasiya instansiyasında təsdiqlənməsini pislədiyi barədə bəyanat yayıb.
Rəsmi Bakı bəyanata dərhal cavab verib. Azərbaycan Xarici İşlər Nazirliyinin mətbuat katibi Ayxan Hacızadə deyib: “Fransanın Avropa və Xarici İşlər Nazirliyinin Fransa vətəndaşı Martin Rayan barəsində çıxarılmış hökmə dair məhkəmə prosesini şübhə altına alan və ölkəmizə qarşı əsassız ittihamları ehtiva edən 30 iyul tarixli bəyanatını qətiyyətlə rədd edirik. Martin Rayan barəsində cinayət işi Azərbaycan Respublikasının qanunvericiliyinə uyğun olaraq araşdırılıb və təqdim edilmiş sübutlar və ona qarşı irəli sürülən ittihamlar əsasında məhkəmə qərar qəbul edib. Apelyasiya instansiyasının qərarı da Azərbaycan Respublikasının qanunvericiliyi çərçivəsində həyata keçirilmiş məhkəmə prosesinin nəticəsidir. Bu baxımdan, Fransa tərəfinin məhkəmə proseslərinə siyasi don geyindirməsi, Azərbaycan məhkəmələrinin fəaliyyətinə müdaxilə xarakteri daşıyan bəyanatlar verməsi, “əsassız saxlanılma” və “ədalətsiz məhkəmə araşdırması” ilə bağlı iddialar irəli sürməsi qəbuledilməzdir. Məhkəmə prosesi zamanı təqsirləndirilən şəxsin prosessual hüquqları Azərbaycan Respublikasının qanunvericiliyi və ölkəmizin beynəlxalq öhdəliklərinə uyğun şəkildə təmin olunub. Fransa səfirliyinin konsulluq nümayəndələrinin də bütün məhkəmə iclaslarında iştirak etməsi prosesin şəffaf şəkildə həyata keçirildiyini bir daha təsdiqləyir”.
XİN rəsmisi Fransa tərəfini Azərbaycan Respublikasının suverenliyinə, daxili işlərinə və müstəqil məhkəmə sisteminə hörmət etməyə, habelə ikitərəfli münasibətlərə zərər vuran əsassız ittihamlardan çəkinməyə çağırıb. Qeyd edək ki, Fransaya casusluqda ittiham olunan Martin Rayan və dövlətə xəyanətdə təqsirləndirilən Azad Məmmədli barəsində Dövlət Təhlükəsizliyi Xidmətində (DTX) başlanılmış cinayət işi üzrə çıxarılan hökmdən apelyasiya şikayəti üzrə məhkəmə prosesi iyulun 29-da başa çatıb. Təqsirləndirilən şəxslər DTX tərəfindən 2023-cü il dekabrın 4-də həbs olunublar. Qərara əsasən, müdafiə tərəfinin verdiyi şikayət təmin edilməyib və Bakı Ağır Cinayətlər Məhkəməsinin hökmü dəyişdirilmədən saxlanılıb. Bakı Ağır Cinayətlər Məhkəməsinin hökmü ilə Martin Ryan 10 il, Azad Məmmədli isə 12 il müddətinə azadlıqdan məhrum edilib.
