Azərbaycan serial industriyasında bir ilkə imza atılır! “VerTex Cinema”nın təqdimatında hazırlanan “13-cü MADDƏ” adlı yeni layihə ölkənin ilk retro mafiyaya əsaslanan serialı kimi tamaşaçıların qarşısına çıxmağa hazırlaşır.
Artıq yayıma başlamamışdan öncə böyük maraq və reytinqlər qazanan serial 13 bölümdən ibarət olacaq. Layihədə Azərbaycan tamaşaçısının yaxından tanıdığı Əjdər Zeynalov, Vaqif Kərimov, Elçin Əfəndli, Elxan Quliyev, Orxan Ələkbərov və digər peşəkar aktyorlar rol alıblar.
Serialın ssenari müəllifi və rejissoru Tehran Osmanov bildirib ki, baş qəhrəman olan Karol, 13 mafiyanın lideri olaraq toxunulmaz və sirli xarakteri ilə fərqlənir. Serialda Karolla yanaşı 13 fərqli mafiya liderinin hekayəsi öz əksini tapacaq.
Layihənin baş prodüseri Rövşən İsmayılov, prodüserlərdən biri isə Sərxan Rzayevdir. Maraqlısı budur ki, hər iki prodüser serialda aktyor obrazlarında da çıxış ediblər.
“13-cü MADDƏ” serialının ARB TV-də yayımlanması nəzərdə tutulur və bu yaxınlarda tamaşaçılara təqdim olunacaq. İlk retro mafiya mövzulu bu serial, yalnız kriminal xətti ilə deyil, vizual estetikası və 80-90-cı illərin atmosferini etdirən retro tərzi ilə də fərqlənəcək.
.
