Azərbaycanın istedadlı və çalışqan gənc xanımlarından biri olan Rəvanə Ağayeva artıq 19 yaşında şəxsi biznesini uğurla quraraq yaşıdlarına nümunə göstərir. Gənc sahibkar hələ 17 yaşında məktəbi bitirdikdən və universitetə sənədlərini təqdim etdikdən sonra əl işlərinə maraq göstərərək buket hazırlanması sahəsində peşəkar fəaliyyətə başlayıb.
Rəvanə öz təşəbbüsü ilə sosial şəbəkədə buket sifarişləri üçün səhifə yaradaraq müştəri bazasını formalaşdırıb. Onun bu sahəyə olan həvəsi və işinə məsuliyyətlə yanaşması nəticəsində qısa müddətdə geniş auditoriya tərəfindən tanınıb. Ailəsinin – xüsusilə anası Ağayeva Aynurə və bacısı Ağayeva Rəşidənin daimi dəstəyi ilə bu yolda inamla irəliləyən Rəvanə, iki il ərzində şəxsi iş yerini açaraq fəaliyyətini daha da genişləndirib.
Hazırda Bakı Xoreoqrafiya Akademiyasında ali təhsil alan gənc xanım, eyni zamanda öz işinin rəhbəri olmaqla yaşıdlarından seçilir. Onun sözlərinə görə, müstəqil şəkildə ayaqda durmaq və gənc yaşda rəhbərlik etmək böyük məsuliyyət və zəhmət tələb edir.
“Bu gün bu yola çıxmağımda ən böyük rol anamındır. Mama bizi atasız böyüdüb və bütün əziyyətlərə tək dözərək həm bacımı, həm məni yetişdirib. Mənim əsas məqsədim ona bu gün və gələcəkdə dəstək olmaq, onu daim zirvədə tutmaqdır”, – deyə Rəvanə bildirir.
Buket sənəti ilə yanaşı, Rəvanə həm də modellik və reklam sahəsinə maraq göstərir. Sosial media üzərindən fəaliyyət göstərən Rəvanə bu istiqamətdə də özünü inkişaf etdirərək fərqli layihələrdə iştirak edir.
Gələcək planlarından danışan gənc sahibkar bildirir ki, məqsədi təkcə Azərbaycanda deyil, beynəlxalq arenada da tanınan uğurlu bir iş xanımı olmaq və öz məhsullarını dünya bazarına çıxarmaqdır.
Rəvanə Ağayeva artıq bu gün bir çox insan tərəfindən tanınan, sevilən və hörmət edilən bir gənc xanım kimi gələcəyə ümidlə baxır və uğurları ilə ailəsini və ətrafını sevindirməyə davam edir.
