“AKnews.az” redaksiyasına daxil olan məlumata görə, Bakı şəhərinin Nəsimi rayonunda qanunsuz tikinti və korrupsiya halları ilə bağlı ciddi iddialar var. Bildirilir ki, Müdafiə Nazirliyində general rütbəsində xidmət edən şəxsin qohumu Mənzil İstismar Sahəsinin (MİS) rəisi təyin edilib və icra hakimiyyətinin qeyri-rəsmi maliyyə əməliyyatlarına rəhbərlik edir.
İddiaya görə, MİS rəisi icra hakimiyyətinin Tikinti şöbəsinin müdiri Ramiz Quliyevlə sıx əlaqədə olaraq tikinti sahəsindəki hesabatları ona təqdim edir. Daha sonra isə icra hakimiyyətinin birinci müavini Gülarə Verdiyevanın göstərişi ilə tikinti sahibinə obyektinin söküləcəyi bildirilir və ondan müəyyən məbləğ tələb olunur.
Hacı Fərid və onun arxasında duran şəxs
Məlumata görə, qanunsuz tikinti ilə bağlı əsas fiqurlardan biri ərazidə yerləşən “Köhnə Ciyərxana” restoranının sahibi kimi tanınan Hacı Fəriddir. O, iddialara görə, icra hakimiyyətindəki müəyyən şəxslərlə əlaqə quraraq tikinti layihəsini həyata keçirməyə çalışır.
Daxil olan məlumatlarda Hacı Fəridin təkbaşına hərəkət etmədiyi, onun arxasında duran şəxsin isə Müşfiq Rəhimov olduğu iddia edilir. Qeyd edək ki, 08.01.2020-ci il tarixində Daxili İşlər naziri, general-polkovnik Vilayət Eyvazovun əmri ilə M. Rəhimov BDYPİ-nin “Siqnal” idarəsinə rəis müavini təyin edilib. Bildirilir ki, məhz bu əlaqələr sayəsində Hacı Fərid müəyyən rəsmi qurumlardan dəstək alaraq qanunsuz fəaliyyətlərini davam etdirə bilir. Ətrafda yaşayan insanların fikrilərinə hörmətsizlik edərək biznesini genişləndirilməsi sürətləndirilib. Qeyd edilməlidir ki bayram günlərində orqsnların işləməməsindən istifadə edən Hacı Fərid qanunsuz əməlini davam etdirir.
Mir Cəlal Paşayev prospektində qanunsuz tikinti
Daxil olan məlumatlara əsasən, qanunsuz tikinti Mir Cəlal Paşayev küçəsində baş verir. Xatırladaq ki, Mir Cəlal Paşayev Azərbaycanın görkəmli yazıçısı, ədəbi tənqidçisi və dramaturqu olmaqla yanaşı, Azərbaycan Respublikasının Birinci Vitse-prezidenti Mehriban Əliyevanın babasıdır. Mehriban Əliyevanın təşəbbüsü ilə bu ərazidə abadlıq işləri aparılmışdır.
Buna baxmayaraq, Nəsimi Rayon İcra Hakimiyyətinin bəzi səlahiyyətli şəxsləri bu ərazini qeyri-qanuni tikintilərə açıq zona kimi istifadə etməyə çalışırlar. Məlumata görə, abadlaşdırılmış məhəllənin bir hissəsi dağıdılaraq yerində çayxana tikilmək istəyilir. Bu işlərə rəhbərlik edən tikinti sahibi Hacı Fəriddir. O, iddialara görə, Müşfiq Rəhimovun dəstəyi ilə layihəsini maneəsiz icra etmək üçün müəyyən vəsaitlər xərcləyir.
İcra Hakimiyyətində məxfi planlar və qanunsuzluqlara göz yumulması
Mənbələrin bildirdiyinə görə, Nəsimi Rayon İcra Hakimiyyətinin Tikinti şöbəsinin müdiri Ramiz Quliyev və birinci müavin Gülarə Verdiyeva qeyri-qanuni tikintilərə şərait yaradır. Eyni zamanda, icra hakimiyyətində çalışan Müşfiq Kərimli yayılan məlumatların silinməsi üçün müxtəlif üsullara əl atır və bu prosesdə tikinti sahibinə köməklik göstərir.
Sual olunur: Yaşayış binasının qarşısında domino və nərd oynanacaq çayxananın tikilməsi kimə nə qazandıracaq? Bu, Nəsimi rayon sakinlərinin sosial rifahına hansı müsbət təsiri göstərə bilər?
Redaksiyamıza daxil olan məlumata görə, Hacı Fərid və onun arxasında duran şəxslə bağlı bütün bu iddialar araşdırılacaq və cəmiyyətə rəsmi açıqlama veriləcək. Hüquq-mühafizə orqanları, Baş Prokurorluq və Dövlət Şəhərsalma və Arxitektura Komitəsi bu iddiaları araşdırmalı və qanunsuz fəaliyyətlərə son qoymalıdır.
Eyni zamanda, Bakı Şəhər İcra Hakimiyyəti və Nəsimi Rayon İcra Hakimiyyəti baş verənlərə aydınlıq gətirməli və ictimaiyyətə hesabat verməlidir. Əks halda, bu cür halların davam etməsi paytaxtın inkişafına mane olacaq və vətəndaşların dövlət orqanlarına inamına ciddi zərbə vuracaq.
“AKnews.az” olaraq, məsələ ilə bağlı aidiyyəti qurumların rəsmi mövqeyini gözləyirik.
