Şirinlik kimi hind toyuğu, quzu da verilirmiş – Xəstəxanadakı rüşvət sxeminin TƏFƏRRÜATI

Musavat.com xəbər verir ki, 58 yaşlı təqsirləndirilən şəxs əlillik almaq istəyən insanlarla əvvəlcədən görüşlər keçirib, onlara müvafiq sənədlərin hazırlanmasında köməklik göstərəcəyini vəd edib.

İstintaq orqanı müəyyən edib ki, İlqar Məmmədov ümumilikdə 26 nəfərdən leykoz, ağır eşitmə, xərçəng və digər xəstəliklər əsasında əlillik dərəcələrinin və əlilliyə görə əmək pensiyalarının təyin edilməsində və ya qüvvədə olma müddəti başa çatmış əlillik dərəcələrinin və əlilliyə görə əmək pensiyalarının müddətinin saxta yollarla uzadılmasında vasitəçilik edərək 1500-8000 min manat arası pul alıb. Məlumata görə onun aldığı pulun ümumi dəyəri 84800 manat olaraq müəyyən edilib. Bu məbləğlər birbaşa təqsirləndirilən şəxsə yox, komissiya sədrinə və digər vəzifəli şəxslərə verilib.

İstintaqla sənədlərin saxta olduğu, həkimlər tərəfindən heç bir real tibbi əsas olmadan müvafiq arayışların hazırlandığı müəyyən edilib.

İ.Məmmədova qarşı Cinayət Məcəlləsinin 312-1.1-ci maddəsi ilə ittiham irəli sürülüb. O, qabaqcadan əlbir olan bir qrup şəxs halında öz həqiqi təsir imkanlarından istifadə edərək vəzifəli şəxsin qərarına qanunsuz təsir etmək məqsədilə özü üçün şəxsən birbaşa yolla maddi neməti təkrarən istəməklə təkrarən alıb, nüfuz alveri edib.

İstintaqla müəyyən edilib ki, ayır-ayrı şəxslərlə bağlı müxtəlif diaqnozlara dair saxta məlumatları Əmək və Əhalinin Sosial Müdafiəsi Nazirliyinin mərkəzləşdirilmiş informasiya sisteminə daxil ediblər. Bunun üçün sədr və komissiyanın üzvlərin elektron imza kartlarından istifadə edilib.

Təqsirləndiirlən şəxs əməlini qismən etiraf edib. Bildirib ki, bu işləri Saatlı Rayon Mərkəzi Xəstəxanasının Həkim Məsləhət Komissiyasının üzvləri ilə birlikdə edib.

O, ifadəsində ayrı-ayrı şəxslərdən pul alıb həkimlərə verdiyini, bunun qarşılığında isə hər işdən ona 100-200 manat çatdığını deyib. Təqsirləndirilən şəxs Səliqə adlı qadından əlillik müddətinin uzadılması üçün 2500 manat alıb həkim komissiyasına verdiyini, buna görə ona 200 manat xeyir çatdığını deyib. Əlavə edib ki, Səliqə adlı qadın pulu olmadığı üçün ona hörmət olaraq bir ədəd də hind toyuğu da verib.

Digər şahid ifadələrindən də məlum olub ki, rüşvət verib saxta əlillik alan şəxslər arasında əlavə olaraq “şirinlik” kimi quzu verənlər də olub.

Onun sözlərinə görə əmisi oğlu Elxan da bu işdə ona kömək edib. 12 nəfərə saxta əlillik pensiyası düzəltmək üçün ona ümumilikdə 40 min manat verib. O, da həmin məbləği həkimlərə çatdırıb.

Şahidlərin ifadələrindən məlum olub ki, təqsirlədirilən İlqar Məmmədov günün əsas hissəsini xəstəxanada keçirir, əlilliklə bağlı problemləri olan şəxsləri onunla əlaqə yaradaraq işlərini “həll” edirmişlər.

İ.Məmmədov daha əvvəl xəstəxananın baş həkiminin müalicə işləri üzrə müavini – baş həkim vəzifəsində işləyibmiş.

İlqar Məmmədovun cinayət işi Saatlı Rayon Məhkəməsində araşdırılıb. Hökmə əsasən, o, üç il müddətinə azadlıqdan məhrum edilib. Onun barəsində seçilmiş polisin nəzarəti altına vermə qətimkan tədbiri ləğv edilərək barəsində həbs qətimkan tədbiri seçilib və məhkəmə zalında həbs olunub.

Qeyd edək ki, Saatlı Rayon Mərkəzi Xəstəxanasının Həkim Məsləhət Komissiyasının sədri və digər vəzifəli şəxsləri barəsində də cinayət işi açılıb və ayrıca icraata verilib.