Musavat.com xəbər verir ki, istintaq hakimin 21 min manat rüşvət aldığını aşkar edib. İttihama görə Elsun Əhmədov hakim olan zaman icraatında Məqsəd Bayramovun narkotik ittihamı ilə həbs edilməsi ilə bağlı iş olub. Hakim Məqsəd Bayramovun arvadından bu iş üzrə minimum həddə cəza təyin etmək üçün 21 min manat pulu rüşvət olaraq tələb edib. Hakim pulu iclas katibi Orxan vasitəsi ilə 10 min, 8 min və 3 min olmaqla hissə-hissə alıb. Hakim aldığı rüşvətin qarşılığında Məqsəd Bayramova minimum həddə- 3 il azadlıqdan məhrumetmə cəzası təyin edib.
Hakim məhkəmədə ifadə verən zaman özünü rüşvət almaqda yox, dələduzluqda günahkar bilib. Pulu almasının səbəbi kimi isə anasının onkoloji xəstə olmasını göstərib. Deyib ki, sonra atası da onkoloji xəstə olduğu üçün aldığı pulu geri qaytara bilməyib.
Elsun Əhmədovun dediklərindən aydın olub ki, pul alınan zaman videogörüntü olub:
“Mən otağımda pul almamışam. Orada kiminsə çəkiliş aparması mümkün deyil. Həmin görüntülərin necə çıxdığını bilmirəm.
İlk dəfə deyildi ki, belə bir işdə bu cür hökm çıxırdı. Qərarı elan edəndən sonra mənə zənglər gəldi. Dedilər ki, gərək əvvəldən deyərdin. Mən bir işdə bəraət verəndən sonra bu problemlər yaranmağa başladı. Əməlimdən peşmanam”,- deyə hakim qeyd edib.
İş üzrə şahid qismində dindirilən Aygül Bayramova deyib ki, pulu birbaşa hakimin özünə yox, köməkçisi Orxana verib: “Mən pulu Orxana vermişəm, o da hakimə verib. Amma pulu verəndən sonra işi uzatdılar. 18 mindən sonra əlavə 3 min istədilər ki, yuxarıdan razılıq almaq lazımdır. Mən də verdim. Sonra gördüm ki, iş uzanır. Mənə deyilmişdi ki, ərimi azadlığa buraxacaqlar. Məsələ uzanır, evdə məni lağa qoyurdular. Bu, mənə pis təsir edirdi. Elsun müəllimin hakimlik vaxtının bitdiyini bildikdən sonra şikayət etmək qərarına gəldim. Buna görə də korrupsiyaya ərizə yazdım. Mənə heç kim məsləhət verməyib”.
A.Bayramova deyib ki, ondan alınan 21 min manat Elsun Əhmədovun vəkili vasitəsi ilə geri qaytarılıb.
Burada diqqət çəkən məqam budur ki, sabiq hakim Elsun Əhmədov ifadəsində bu işlərin haradan qaynaqlandığına işarə edir, amma ad çəkmir. Aygül Bayramova da ondan soruşulmadığı halda “heç kimdən məsləhət almamışam” deyə izahat verir.
Bütün hallarda ortada fakt budur ki, rüşvət alınıb və sabiq hakim özü bunu etiraf edir.
Məhkəmədə məlum olub ki, A.Bayramova pulları verən zaman telefonla çəkilişlər aparıb. O, məhkəmə binasına gələn zaman özündə olan bir telefonu polis əməkdaşlarına verib. İkinci telefonu isə gizli şəkildə üzərində gizlədib. O, hakim köməkçisi Orxana məhkəmənin mətbəxində pul verən zaman çəkiliş edib. Sonra həmin görüntüləri disklərə köçürərək saxlayıb.
Belə şübhə yaranıb ki, A.Bayramova xüsusi avadanlıqla bu çəkilişi aparıb və ona bunu kimsə məsləhət görüb. Amma Bayramova bunu inkar edib. Telefonu necə və hansı formada çəkilişə hazır vəziyyətə gətirməsi haqda,- “şəxsi işimdir”,- deyərək, cavab vermək istəməyib. Maraqlısı budur ki, çəkiliş etdiyi telefon hazırda yoxdur. Bayramova telefonun sındığını və atdığını deyib.
Gəncə Ağır Cinayətlər Məhkəməsinin hökmü ilə Elsun Əhmədov 5 il müddətinə azadlıqdan məhrum edilib. O, məhkəmə zalında həbs edilmişdi.
