Fond bazarında hazırda müəyyən qeyri-müəyyənlik müşahidə olunur və bir neçə həftə əvvəl dəyəri sürətlə artan süni intellekt şirkətlərinin səhmləri satış təzyiqi ilə üzləşib.
Valyuta.Az-ın verdiyi xəbərə görə, bu tendensiyadan “Broadcom” (NASDAQ: AVGO) da yan keçməyib. 2026-cı ilin iyun ayının əvvəlinə qədər şirkətin səhmləri bazarın ən uğurlu aktivlərindən biri hesab olunurdu. Lakin investorların gözləntilərini tam doğrultmayan maliyyə hesabatı və Sİ sektorunda mənfi bazar əhvali-ruhiyyəsi səhmlərin ucuzlaşmasına səbəb olub.
Bu ilin əvvəlində “Broadcom”un səhmləri pik nöqtədə təxminən 40 faiz bahalaşmışdı. Məqalənin yazıldığı vaxta olan məlumata görə isə illik artım təxminən 9 faiz təşkil edir.
Bununla belə, “Broadcom”un uzunmüddətli perspektivləri bir çox rəqibi ilə müqayisədə daha güclü görünür.
“Broadcom”un xüsusi Sİ çip biznesi genişlənir
Şirkət müxtəlif sahələrdə fəaliyyət göstərsə də, investorların əsas diqqəti onun sifariş əsasında hazırladığı xüsusi süni intellekt çiplərinə yönəlib.
Hazırda əksər şirkətlər Sİ tətbiqləri üçün qrafik prosessorlardan (GPU) istifadə edir. GPU-lar yüksək məhsuldarlığa və çevikliyə malikdir, müxtəlif hesablama yüklərini yerinə yetirə bilir.
“Broadcom” məhz bu ehtiyacı nəzərə alaraq müxtəlif Sİ şirkətləri ilə əməkdaşlıq edir və onların tələblərinə uyğun xüsusi çiplər hazırlayır.
Şirkətin son maliyyə rübündə Sİ yarımkeçiricilərindən əldə etdiyi gəlir 10,8 milyard dollar təşkil edib ki, bu da illik müqayisədə 143 faiz artım deməkdir. “Broadcom” rəhbərliyi hesab edir ki, bu biznes istiqamətinin gəlirləri 2027-ci ildə 100 milyard dolları ötə bilər.
Bu artımın əsas səbəbi şirkətin iri Sİ müştəriləri üçün hazırladığı xüsusi çiplərin kütləvi istehsala daxil olmasıdır.
“Broadcom” bu istiqamətdə dörd əsas tərəfdaşını qeyd edir: “Alphabet”, “Meta”, Anthropic və OpenAI. Hazırda yalnız “Alphabet”in TPU (Tensor Processing Unit) çipi istehsalata buraxılıb.
Digər üç şirkətin hazırladığı çiplərin isə 2027-ci ildə istehsala başlaması planlaşdırılır ki, bu da “Broadcom” üçün əlavə gəlir artımı potensialı yaradır.
Soztv.az
