Vətəninfo.az xəbər verir ki, 15 iyun 2026-cı il tarixli 2026/1364 saylı Qərara əsasən, Ukraynanın ərazi bütövlüyünü və suverenliyini təhdid edən şəxslərin siyahısı genişləndirilib.
Siyahıya daxil edilən şəxslər arasında diqqət çəkən məqamlardan biri Tahir Qarayevin adının yer almasıdır.
Qərarın detalları:
Tahir Qarayev: “Coral Energy” (sonradan “2Rivers Group”) şirkətinin təsisçisidir.
Sanksiyanın səbəbi: Rəsmi sənəddə qeyd olunur ki, Qarayev Rusiya neftinin, xüsusilə “Rosneft” şirkətinin məhsullarının ixracını gizli sxemlər vasitəsilə təşkil edib.
İttiham: O, Rusiyanın beynəlxalq sanksiyalardan yayınmaq üçün yaratdığı və “kölgə donanması” adlanan geniş şəbəkə vasitəsilə Kremlə ciddi gəlirlər əldə etməsinə birbaşa dəstək verməkdə ittiham olunur.
Qeyd edək ki, Avropa İttifaqı bu qərarla Rusiyanın müharibəni maliyyələşdirmək imkanlarını məhdudlaşdırmağı və onun hərbi-sənaye kompleksinə edilən dəstəyi kəsməyi hədəfləyir. Ümumilikdə, yeni sanksiya paketi 9 fiziki şəxs və 45 müxtəlif qurumu əhatə edir.
Sənəd artıq qüvvəyə minib və Avropa İttifaqının rəsmi qəzetində dərc edilib.
Məhdudiyyətlər: Bu qərarla Tahir Qarayevin Avropa İttifaqı ərazisindəki bütün aktivləri dondurulur, onun Aİ ölkələrinə daxil olmasına (səyahət qadağası) və Aİ vətəndaşları və ya şirkətləri tərəfindən ona hər hansı bir iqtisadi resursun ötürülməsinə qadağa qoyulur.
Soztv.az
