Bakı şəhər sakini Cəlal Abıyev Hamlet oğlu məhkəmə qərarlarının icrası sahəsində ciddi problemlə üzləşdiyini bildirir. Onun sözlərinə görə, Xətai Rayon Məhkəməsi tərəfindən çıxarılmış və qanuni qüvvəyə minmiş qərarın icrası artıq bir ildən çoxdur ki, təmin olunmur. Bu səbəbdən vətəndaş məsələ ilə bağlı Ədliyyə Nazirinə rəsmi müraciət ünvanlayıb.
Məlumata görə, iş üzrə məhkəmə qərarında cavabdeh şəxsin vurduğu maddi zərərə görə 1800 manat məbləğində kompensasiya ödəməsi nəzərdə tutulub. Həmçinin dövlət rüsumunun ödənilməsi ilə bağlı müvafiq qərar qəbul edilib. Lakin buna baxmayaraq, qərarın icrası istiqamətində icra qurumları tərəfindən real addımların atılmadığı iddia olunur.
Cəlal Abıyev bildirir ki, məhkəmə qərarının icrası ilə bağlı Xətai rayon icra şöbəsinə dəfələrlə müraciət etsə də, məsələ ya süründürməçiliyə məruz qalıb, ya da ümumiyyətlə diqqətsiz yanaşılıb:
Vətəndaş hesab edir ki, icra məmurlarının fəaliyyətsizliyi və ya laqeydliyi nəticəsində məhkəmə qərarlarının kağız üzərində qalması hüquqi dövlət prinsiplərinə ziddir. Onun sözlərinə görə, belə halların qarşısı alınmazsa, vətəndaşların məhkəmələrə olan inamı ciddi şəkildə sarsıla bilər.
Bu səbəbdən Cəlal Abıyev Hamlet oğlu Azərbaycan Respublikasının Ədliyyə Nazirinə ünvanladığı müraciətdə aşağıdakı məsələlərin araşdırılmasını xahiş edir:
– Xətai rayon icra şöbəsinin fəaliyyətsizliyinə hüquqi qiymət verilməsi
– Məhkəmə qərarının icrasının dərhal təmin olunması
– İcra prosesini ləngidən məsul şəxslər barəsində tədbir görülməsi
Müraciətdə qeyd olunur ki, məhkəmə qərarlarının icra olunmaması təkcə bir vətəndaşın problemi deyil, ümumilikdə hüquq sisteminə olan etimadı sarsıdan ciddi bir məsələdir.
Məsələ ilə bağlı aidiyyəti qurumların mövqeyi hələlik açıqlanmayıb. Lakin hüquqşünaslar bildirirlər ki, məhkəmə qərarlarının vaxtında və tam icrası qanunun aliliyinin əsas göstəricilərindən biridir və bu sahədə yaranan problemlər dərhal aradan qaldırılmalıdır.
Soztv.az
