Quba-Xaçmaz Regional Təhsil İdarəsinin tabeliyində fəaliyyət göstərən Quba şəhər 10 nömrəli körpələr evi-uşaq baxçasında 2023-cü ildə aparılan yoxlamalar zamanı ciddi nöqsanlar aşkarlandığı bildirilmiş, nəticədə müəssisənin müdiri olmuş Poladova Gülnar Mövlan qızı regional idarə tərəfindən vəzifəsindən azad edilmişdi.
Lakin məsələ bununla bitmir.
Redaksiyamıza daxil olan məlumatlara görə, Gülnar Poladova bir müddət sonra Quba rayonu Ədalət Nöhbalayev adına Söhüb kənd ümumi orta məktəbinə “Uşaq birliyi təşkilatı rəhbəri” (UBR) vəzifəsinə müddətli əmək müqaviləsi ilə işə götürülüb. İddia olunur ki, bu işə qəbul Quba-Xaçmaz Regional Təhsil İdarəsinin Maliyyə-iqtisad sektorunun əməkdaşı Ruslan Rzayevin köməkliyi və tapşırığı ilə həyata keçirilib.
Ancaq burada da ziddiyyətli məqamlar bitmir.
UBR olub, amma məktəbdə yoxdur?
Məlumatlarda bildirilir ki, Gülnar Poladova sənədlərdə Söhüb kənd məktəbində UBR kimi göstərilsə də, faktiki olaraq həmin məktəbdə fəaliyyət göstərmir. Əvəzində onun hazırda Quba-Xaçmaz Regional Təhsil İdarəsində “məsləhətçi” kimi çalışdığı, əsasən isə işə qəbul üçün təqdim olunan ərizələrin toplanması və qəbulu ilə məşğul olduğu iddia olunur.
Bu hal bir tərəfdən məktəbdə faktiki çalışmayan işçi – yəni “ölü can” saxlanılması, digər tərəfdən isə Regional Təhsil İdarəsində rəsmi statusu olmayan şəxsin faktiki fəaliyyət göstərməsi ehtimalını gündəmə gətirir.
Qeyri-rəsmi sektor, rəsmi səlahiyyət?
Redaksiyamıza daxil olan daha bir ciddi iddiaya görə, Ruslan Rzayev rəsmi olaraq Maliyyə-iqtisad sektorunun əməkdaşı olsa da, faktiki olaraq özünə məxsus qeyri-rəsmi “şəxsi sektor” formalaşdırıb və bu strukturu ayrıca bir idarəetmə mexanizmi kimi həyata keçirir. Bildirilir ki, Regional Təhsil İdarəsinin müxtəlif sektorlarında Ruslan Rzayevə birbaşa tabe olan əməkdaşlar mövcuddur.
Xatırladaq ki, əvvəlki yazılarımızda da Tədrisin keyfiyyətinə nəzarət sektorunun əməkdaşı Səadət Hüseynovanın qeyri-rəsmi uşaq bağçalarına və körpələr evlərinə nəzarət etdiyi iddiaları yer almışdı. Məlumatlara əsasən, Səadət Hüseynova faktiki olaraq Tədrisin keyfiyyətinə nəzarət sektorunun deyil, Ruslan Rzayevin formalaşdırdığı qeyri-rəsmi şəxsi strukturun əməkdaşı kimi fəaliyyət göstərir. Eyni zamanda, Gülnar Poladovanın da sözügedən qeyri-rəsmi sektorun əməkdaşlarından biri olduğu bildirilir.
Ərizələri kim və hansı səlahiyyətlə toplayır?
Daxil olan məlumatlara görə, işə qəbul üçün ərizələrin toplanması prosesi də Ruslan Rzayevin tapşırığı ilə həyata keçirilir. Halbuki Maliyyə-iqtisad sektorunda çalışan bir şəxsin kadr məsələlərinə bu səviyyədə müdaxilə etməsi ciddi suallar doğurur:
Bu səlahiyyət Ruslan Rzayevə kim tərəfindən və hansı hüquqi əsasla verilib?
Quba-Xaçmaz Regional Təhsil İdarəsində rəsmi idarəetmə strukturları mövcuddurmu, yoxsa proseslər qeyri-rəsmi “şəxsi sektorlar” vasitəsilə tənzimlənir?
Nöqsanlara görə işdən azad edilən şəxs hansı əsaslarla yenidən sistemə qaytarılıb?
Qeyd olunan iddialarla bağlı Bakunews.az tərəfindən Quba-Xaçmaz Regional Təhsil İdarəsinə rəsmi sorğu ünvanlansa da, indiyə qədər sorğuya hər hansı cavab verilməyib. Halbuki “KİV haqqında” Azərbaycan Respublikasının Qanunu dövlət qurumlarını media subyektlərinin sorğularını qanunla müəyyən edilmiş müddətdə cavablandırmağa borclu edir.
Quba-Xaçmaz Regional Təhsil İdarəsində baş verənlər adi nəzarətsizlikdir, yoxsa sistemli və məqsədli idarəetmə modelidir?
Bakunews.az olaraq mövzunu diqqətdə saxlayır, qarşı tərəfin mövqeyini dərc etməyə hazırıq.
Əlaqə whatsapp:+994 70 603 73 77
Soztv.az
