Bakunews.az: Abşeron rayonunun Xırdalan şəhərində yerləşən AAF Park yaşayış kompleksində yenidən qanunsuz tikinti halları müşahidə olunmağa başlayıb. Sakinlərin verdiyi məlumata görə, istirahət və yaşıllıq zonası kimi nəzərdə tutulmuş ərazilər getdikcə fərdi maraqlar naminə zəbt olunur və bu hal artıq adi bir prosesə çevrilib.
Qanunsuz tikinti aparan şəxslərin konkret kimliyi hələlik müəyyən edilməsə də, görülən mənzərə açıq şəkildə göstərir ki, aidiyyəti qurumlar – xüsusilə Abşeron Rayon İcra Hakimiyyətinin Memarlıq və Tikinti şöbəsi – bu prosesə ya göz yumur, ya da dolayısı ilə razılıq verir. Halbuki, bu qurumun birbaşa vəzifəsi şəhərsalma qaydalarının qorunması və qanunsuz tikintilərin qarşısının alınmasıdır.
Sakinlər haqlı olaraq sual edirlər: “İstirahət üçün salınmış ərazilər kimlərin şəxsi mülkiyyətinə çevrilir? Və niyə bu prosesə cavabdeh qurumlar səssiz qalır?”
Daha acınacaqlısı isə budur ki, son illərdə Xırdalanda – xüsusilə AAF Park ətrafında – bu cür qanunsuz tikintilərin intensivləşməsi, bu halların artıq rüşvət mexanizmləri ilə “həll edildiyini” ehtimal etməyə əsas verir. Sanki bəzi “toxunulmazlar” üçün nə tikinti normaları, nə də ictimai maraq önəmlidir.
“Yaşamaq yox, dözmək olur”
Sakinlərin sözlərinə görə, tikinti işləri bəzən gecə saatlarında aparılır, yaşıllıqlar məhv edilir, istirahət zonaları betonlaşdırılır. Bu isə həm mənzərəni eybəcərləşdirir, həm də sosial mühitin keyfiyyətini aşağı salır. “Uşaqlarımız üçün bircə park var idi, indi o da zəbt olunub. Kiminsə biznes marağı, bizim nəfəs aldığımız yeri məhv edir,” – deyə bir sakin narazılığını bildirir.
İcra Hakimiyyətinin Səssizliyi – Susmaq Razılıqdırmı?
Bir daha qeyd edək ki, AAF Park ərazisi rəsmi olaraq Abşeron Rayon İcra Hakimiyyətinin səlahiyyətində olan bir zonadır. Lakin baş verənlər göstərir ki, ya bu səlahiyyətlər faktiki icra edilmir, ya da fərdi maraqlara qurban verilir. Məsul qurumların bu vəziyyətə göz yumması, əslində qanunsuzluğa şərik olmaq anlamına gəlir.
Bakunews.az olaraq, bu məsələni diqqətdə saxlayacaq, Abşeron Rayon İcra Hakimiyyətindən, həmçinin Dövlət Şəhərsalma və Arxitektura Komitəsindən məsələ ilə bağlı rəsmi açıqlama gözləyirik.
Sonda isə bir çağırış: Cəmiyyətin ictimai məkanlara ehtiyacı var – bu ərazilərin ticarət maraqları naminə yox edilməsi, sadəcə bir parkın yox, şəhər mədəniyyətinin də məhv edilməsi deməkdir.
[media=https://youtube.com/shorts/1xV0eevxqAg?si=NosnVWnpGhqXT8Mz]
Məsələ ilə bağlı Arxiketura v şəhərsalma idarəsi ilə əlaqə saxladıq. Bizə bildirildi ki, 05 iyun 2025-ci il tarixində Bakı şəhəri, Abşeron rayonu, AAAF Park yaşayış kompleksinin ərazisinə Dövlət Şəhərsalma və Arxitektura Komitəsinin müvafiq əməkdaşları tərəfindən baxış keçirilmişdir.
Aparılmış baxış zamanı qeyd olunan ünvanda müvafiq icazəverici sənədlər olmadan özbaşına tikinti-quraşdırma işlərinin aparıldığı aşkar edilmişdir. Aşkarlanmış faktla bağlı qanunvericiliyin tələblərinə uyğun olaraq, aidiyyəti dövlət qurumlarla birlikdə sözügedən tikilinin söküntüsü təmin edilmişdir.
Əlaqə whatsapp:+994 70 603 73 77
Soztv.az
