Son zamanlar bir çoxumuz sosial şəbəkələrdə tez-tez bankların ucuz və sərfəli kredit reklamları ilə qarşılaşırıq. Hətta mobil nömrələrimizə də aşağı faizli kreditlərlərin təklif olunduğu mesajlar göndərilir.
Məsələn, reklam çarxında illik 9,5 faizlə kredit təklif edirlər. Lakin banklara üz tutduqda fərqli mənzərə ilə qarşılaşırıq. Belə ki, müştərinin kredit tarixçəsi araşdırıldıqdan sonra illik 22-28 faizlə kredit ayrıla biləcəyi qeyd olunur. Maraqlıdır, ölkədə kredit faizi niyə bu qədər çoxdur?
Globalinfo.az-a danışan iqtisadçı Natiq Cəfərlinin sözlərinə görə, ölkədə kredit faizinin yüksək olmasının bir çox səbəbləri var.
O, kredit faizinin yüksək olmasını Mərkəzi Bankla əlaqələndirib:
“Əsas səbəblərdən biri Mərkəzi Bankın uçot dərəcəsinin kifayət qədər yüksək səviyyədə olmasıdır. Bundan başqa, son vaxtlar depozitlər də yüksəlib. Artıq banklar 11-12 faizə depozit qəbul edirlər. Təbii ki, bank depoziti yüksək faizlə qəbul edirsə, krediti ondan 5-6 faiz daha yuxarı verməlidirlər ki, həm öz risklərini örtmüş olsunlar, həm də gəlir əldə etsinlər. Faizin yüksək olma səbəbi bundan ibarətdir”.
İqtisadçı deyib ki, depozit faizi aşağı olsa, kredit faizi də az olar:
“Depozit faizini də ona görə artırdılar ki, insanlar əllərində olan manatları banka yönəltsinlər, valyuta bazarına axın olmasın. Əgər biz kredit faizlərinin aşağı düşməsini istəyiriksə, o zaman depozitlərin faizi də aşağı düşməlidir. Yəni depozitlər 4-5 faiz olmalıdır ki, kreditlər 8-10 faiz civarında olsun. Amma belə olan zaman da insanlar banklarda pul saxlamayacaqlar. Əksinə, əllərində olan manat vəsaitini valyutaya yönəldəcəklər ki, bu da dollara olan təlabatı yüksəldəcək. Burada bir çox parametrlər var ki, onlara fikir vermək lazımdır”.
