Bir neçə gün əvvəl öldürüldükləri barədə xəbəri yayılan Samaranın (Rusiya) keçmiş meri Viktor Tarxov və həyat yoldaşı Natalyanın qətli ilə bağlı dəhşətli təfərrüat üzə çıxıb. İstintaqa yaxın mənbələrin məlumatına görə, əsas şübhəli şəxs mərhumların 29 yaşlı nəvəsi Yekaterina Belskayadır.
Soztv.Az bu barədə Rusiya KİV-ə istinadən məlumat verir.
İstintaqın versiyasına görə, təxminən bir ay əvvəl Belskaya öz baba və nənəsini vəhşicəsinə qətlə yetirib.
“Mərhumların cəsədlərinin qalıqları onların Samaradakı mənzilində tapılıb. İlkin versiyaya görə, Yekaterina nənə və babasını öldürüb, doğrayıb, hissələri torbalara və çəlləklərə qoyub, sonra cəsəd hissələrini taksi ilə daşıyaraq şəhərin zibil qutularına atıb”, – deyə mənbədən bildirilib.
Vəhşi qətlin motivi, ehtimal ki, 145 milyon rubl (təxminən 2.5 milyon manat) olub – məhz bu məbləğdə mərhumların Moskva ətrafında malikanələr, Samarada biznes sinif mənzil və avtomobil daxil olmaqla əmlakı qiymətləndirilir.
İstintaqçılar, həmçinin müəyyən ediblər ki, Belskaya narkotik maddələr qəbul edib. Hələ 2020-ci ildə anası məhkəmə vasitəsilə onu məhdud fəaliyyət qabiliyyətli şəxs kimi tanımağa cəhd edib.
Cinayətin qeyri-adekvat vəziyyətdə törədilməsi istisna edilmir.
Hazırda Yekaterina Belskaya həbs edilib. O, ifadə verməkdən imtina edir. İstintaq dəhşətli qətlin bütün hallarını araşdırmağa davam edir və qızın əlbir olduğu şəxslərin ola biləcəyini istisna etmir.
Vilayət prokurorluğu rezonans doğuran işin istintaqını öz nəzarətinə götürüb.
Merin yoxa çıxmasını ilk dəfə Tarxovun keçmiş müavinlərindən biri – Aleksandr Kuznetsov qeyd edib. O, dekabrın 31-də kişini Yeni il münasibətilə təbrik edib, üç gündən sonra isə ad günü münasibətilə təbrik etməyə çalışıb, lakin Tarxov bütün zəngləri kəsib və “danışa bilmirəm”, – deyə mesaj yollayıb.
Keçmiş müavin polisə ərizə yazdıqdan sonra hüquq-mühafizə orqanlarının əməkdaşları Viktor və Natalya Tarxovların yaşadığı evdəki müşahidə kameralarının yazılarını izləyiblər. Onların diqqətini ayın əvvəlində kişinin həyat yoldaşı ilə mənzilə daxil olması və bir daha oradan çıxmamaları cəlb edib. Həmin mənzilə bir neçə dəfə onların 29 yaşlı nəvəsi də gəlib.
Cinayət işi fevralın 3-də açılıb, elə həmin gün Belskayanın ilk dindirilməsi keçirilib. Qız ifadə verməkdən imtina etdikdən sonra müvəqqəti saxlama təcridxanasına yerləşdirilib. Fevralın 5-də Tarxovun nəvəsi iki ay müddətinə həbs edilib.
Mənbələr, həmçinin bildiriblər ki, Tarxovların mənzilində mübarizə və ya qan izləri aşkar edilməyib. Onların nəvəsinin evində ər-arvada məxsus sənədlər və telefonlar tapılıb.
Qeyd edək ki, Viktor Tarxov 2006-2010-cu illərdə Samara meri olub.
