“Qızım xalasıgilə qonaq getmişdi, elə ordan da evimizə acı xəbəri gəldi”.
Bunu Teleqraf-ın Mərkəzi Aran bürosuna açıqlamasında Yevlaxda qida zəhərlənməsindən dünyasını dəyişən 16 yaşlı Mədinə Əzizovanın atası Xalid Əzizov deyib.
“Hələ də özümüzdə gəlməmişik. Nəyin necə baş verdiyini tam anlaya bilməmişik. Tək bildiyimiz odur ki, dünyasını dəyişdiyi vaxt xalası evində qonaq olub. Badımcan bişiriblərmiş, yeməkmyeyib, bir müddət sonra halı pisləşib və qusmağa başlayıb.
Durumunun ciddiliyini görüb onu xəstəxanaya çatdırıblar. Amma ilkin müayinə zamanı övladımın yolda keçindiyi məlum olub. Müayinə və analizin yekunlarını gözləyirik ki, Mədinənin nədən, məhz hansı qidadan zəhərləndiyi bilinsin”, – qeyd edib.
X.Əzizov qızının zəhərlənməsinə mağazadan alınan suxarinin də səbəb ola biləcəcəyini ehtimal edir:
“Mağazadan alınan qida, suxari də ağır zəhərlənməyə təsir etmiş ola bilərdi. Bu kimi suallara yalnız rəsmi formada aydınlıq gətirildikdən sonra cavab tapa biləcəyik.
Fəhlə adamam. Ailəmi, övladlarımı dolandırmaq üçün bütün günü işləyirəm. Hadisə baş verdiyi vaxt da işdə olmuşam. Hazırda o qədər üzgünəm ki, nəyin necə baş verdiyini anlamaqda belə çətinlik çəkirəm”.
O, dünyasını dəyişən Mədinənin Yevlax şəhər 10 saylı tam orta məktəbinin 11-ci sinif şagirdi olduğunu bildirib:
“Çox təəssüf ki, qızımın arzuları yarımçıq qaldı”.
Qeyd edək ki, Yevlax şəhərində, şəhid Hüseyn Cəbrayılov küçəsində yaşayan Əzizovlar ailəsinin 4 övladı var. Onların ikisi oğlan, ikisi isə qızdır.
.jpg)
.jpg)
.jpg)
.jpg)
_-_copy.jpg)
