Vətən uğrunda canından keçmiş şəhidlərin xatirəsinə hörmət Azərbaycan cəmiyyətinin dəyişməz dəyəridir. Bu hörmət təkcə tədbirlərlə və rəsmi çıxışlarla deyil, həm də şəhid ailələrinin müraciətlərinə münasibətlə ölçülür.
Bizimesr.com xəbər verir ki, Qazax rayonunda şəhid Elşən Orucovun məzarı ilə bağlı yayılan videogörüntülər və onun oğlu Ehtiram Orucovun səsləndirdiyi məlumatlar cəmiyyətdə ciddi rezonans doğurub. Videoda şəhid övladı atasının məzarının baxımsız vəziyyətdə olduğunu, bayrağın düzgün asılmadığını, ərazinin təmizlənmədiyini və uzun illər ərzində rayon icra hakimiyyəti rəhbərliyinin ailə ilə kifayət qədər maraqlanılmadığını bildirir.
Bu iddialardan sonra cəmiyyət Qazax Rayon İcra Hakimiyyəti başçısı Rəcəb Babaşovdan məzarın vəziyyəti ilə bağlı konkret izahat gözləyirdi. Lakin yayılan rəsmi açıqlamanın əsas diqqət çəkən hissəsi məzarın vəziyyətindən çox, şəhid övladının şəxsiyyətinə yönəlmiş ittihamlar oldu.
Rəcəb Babaşov videomüraciəti “öyrədilmiş və qərəzli” adlandırdı. Daha sonra isə açıqlamada şəhid ailəsinin guya məktəb ərazisində 11 sot torpaq sahəsini qanunsuz zəbt etdiyi, tikintinin dayandırıldığı və videonun da bununla əlaqədar yayıldığı iddia edildi.
Əcəba, şəhid övladının dediyi sözlərin doğru olub-olmadəğını araşdırmaq əvəzinə, onu niyə ictimai şəkildə “qərəzli” və “böhtançı” kimi təqdim etmək lazım idi?
Əgər məzar həqiqətən qaydasındadırsa, bunu ən yaxşı sübut emosional ittihamlar deyil, yerində çəkilmiş görüntülər, müstəqil baxış və operativ tədbirlər olardı.
Şəhid ailəsinin başqa məsələlərlə bağlı dövlət qurumları ilə hüquqi mübahisəsinin olması da məzarın vəziyyəti barədə səsləndirilən iddiaları avtomatik olaraq əsassız etmir. Bunlar ayrı-ayrı məsələlərdir və hər biri ayrıca araşdırılmalıdır.
İcra hakimiyyətinin açıqlamasında ailəyə göstərilən maddi yardımlar, qəbul görüşləri, mənzil təminatı və digər sosial dəstək tədbirləri geniş şəkildə sadalanır. Şübhəsiz ki, bunlar dövlətin şəhid ailələrinə göstərdiyi sosial siyasətin tərkib hissəsidir və müsbət qiymətləndirilməlidir. Ancaq sosial yardım göstərilməsi o demək deyil ki, şəhid ailəsinin sonradan qaldırdığı hər bir problem əvvəlcədən əsassız sayılmalıdır. Əgər şəhid övladı “məzar baxımsızdır” deyirsə, cavab ilk növbədə həmin məzarın vəziyyətinə dair olmalıdır.
Şəhid övladını ictimai şəkildə “öyrədilmiş”, “qərəzli” və ya “böhtançı” kimi təqdim etmək nə qədər doğrudur? Şəhid ailələri ilə dialoq ittiham dili ilə deyil, hörmət və həssaslıqla qurulmalıdır. Görünür, Rəcəb Babaşov şəhid ailələri ilə o qədər təmassız qalır ki, bu yolu bilmir.
Şəhid övladı ilə dövlət qurumu arasında yaranan mübahisədə ən böyük məsuliyyət məhz dövlət nümayəndələrinin üzərinə düşür. Çünki onların hər sözü cəmiyyətə verilən mesajdır. Bu mesaj isə ittiham yox, ədalət, şəffaflıq və hörmət olmalıdır.
P,S
Dəyəri yüz minlərlə manat avtomobilləri olan, böyük biznes sahələrinə məxsus olan Rəcəb Babaşov üçün şəhid ailəsinə 11 sot torpaq sahəsi vermək o qədərmi çətindir? Kimdir Rəcəb Babaşov?
Bizimesr.com
