Bu forumda biz sülhü və xüsusilə media vasitəsilə sülhün necə təşviq olunmasını müzakirə edirik.
Bunu Teleqraf-a açıqlamasında IV Şuşa Qlobal Media Forumu çəərçivəsində Azərbaycanda səfərdə olan “Al Arabiya” xəbər kanalının aparıcısı Layal Əl-İxtiyar deyib.
O bildirib ki, ötən il də Şuşada, həmçinin Bakıda olub.
“Bizi dəvət etdiyiniz üçün çox təşəkkür edirəm. Mən keçən il gəlmişdim. Prezidentlə müsahibəm olmuşdu. Bu il isə forumda iştirak etmək üçün gəlmişəm. Bu, həqiqətən çox maraqlıdır, çünki sanki bütün dünya eyni zalda toplaşıb. Burada 54 ölkənin nümayəndəsi bir əsas mövzunu, yəni sülhü müzakirə edir”, – jurnalist vurğulayıb.
Onun sözlərinə görə, hazırda dünya müharibələrlə doludur, demək olar ki, hər yerdə müharibə və münaqişə var:
“Bizim ən çox ehtiyac duyduğumuz şey sülhdür və media sülhün təşviqində çox mühüm rol oynayır. Bugünkü sessiyada biz təkcə bunu deyil, həm də saxta xəbərlər olmadan sülhü necə təşviq etməyi müzakirə edirdik. Çünki statistikaya əsasən, insanların 70 faizdən çoxu xəbərləri sosial mediadan alır. Bu xəbərlərin böyük hissəsi saxtadır və insanlar onların saxta olduğunu bilmirlər. Onlar bu xəbərləri qəbul etməyə davam edirlər. Bu, cəmiyyət üçün, xüsusilə də yeni nəsil üçün təhlükəlidir. Çünki bu, çox asanlıqla münaqişələri və dezinformasiyanı təşviq edə bilər.
Jurnalist əslən livanlı olduğunu, lakin Səudiyyə Ərəbistanında fəaliyyət göstərən ümumərəb televiziya kanalında işlədiyini qeyd edib.
O bu gün, eləcə də dünən forumda müzakirə edilən mövzunun ən vacib müzakirə edilməli mövzu olduğunu düşünür.
