Bakunews.az redaksiyasına daxil olan şikayət əsasında paytaxt Bakıda, Bəxtiyar Vahabzadə küçəsində yerləşən “Böyükfırat” restoranlar şəbəkəsinin Elmlər filialı ilə bağlı iddialar ictimai müzakirəyə səbəb olub.
Vətəndaşın iddiasına görə, ailəvi şəkildə həmin restorana müraciət zamanı menyuda göstərilən qiymətlər əsasında sifariş verilib. Lakin hesab təqdim olunduqda kassada çıxarılan məbləğin gözləniləndən xeyli yüksək olduğu müəyyən edilib.
Müştəri bildirir ki, bəzi məhsullarda qiymətlərin təxminən iki dəfə artıq hesablandığı iddia olunur.
Şikayətçinin sözlərinə görə, qiymət fərqi ilə bağlı irad bildirildikdə restoran əməkdaşları tərəfindən bu cür izah verilib:
“Bura Elmlər filialıdır, burada digər filiallara nisbətən fərqli qiymətlər tətbiq olunur.”
Bu yanaşma isə şəbəkə restoran anlayışında mövcud olan vahid qiymət siyasəti ilə bağlı suallar doğurub.
Təqdim olunan məlumatlara əsasən:
Menyu üzrə lahmacun qiyməti: 2.50 – 3.30 ₼
Kassada tətbiq edilən qiymət: 5.20 ₼
Bu isə bəzi məhsullarda təxminən 100%-ə yaxın qiymət fərqi deməkdir.
Bakunews.az olaraq məsələ ilə bağlı “Böyükfırat” restoranlar şəbəkəsinin rəsmi elektron poçt ünvanına sorğu ünvanlanmasına baxmayaraq, indiyədək qarşı tərəfdən heç bir rəsmi cavab verilməyib.
Mövcud iddialar:
menyu qiymətləri ilə kassadakı məbləğ arasında uyğunsuzluq
filial fərqi adı ilə qiymət artımı
müştərinin əvvəlcədən məlumatlandırılmaması
kimi məqamları əhatə edir və istehlakçı hüquqları baxımından araşdırma tələb edir.
Bakunews.az olaraq bildiririk ki, “Böyükfırat” restoranının Elmlər filialı ilə bağlı irəli sürülən iddialar ictimai maraq doğuran məsələ kimi qiymətləndirilir. Şəffaf qiymət siyasəti və istehlakçıların düzgün məlumatlandırılması xidmət sahəsində əsas prinsip hesab olunur.
Mövzu ilə bağlı qarşı tərəfin mövqeyini dərc etməyə hazırıq.
