Bu barədə Mia.az-a ərazidə yaşayan sakinlər şikayət məktubu ünvanlayıblar.
Şikayətdə yerli icra və bələdiyyə qurumlarının ev dəllallarına ərazidə “Qotur” adıyla tanınan gölün qurudulması və orada evlər tikilərək satılmasına şərait yaratmaqla, yaranmış dözülməz problemdən söz açılıb.
Bildirilib ki, mart ayından başlayaraq yağan yağışlardan sonra gölün qalan kiçik hissəsi də daşıb, üstəlik, ərazidə tikilərək baha qiymətlərə satılan onlarla ev çirkab suların içində qalıb: “Hazırda çirkab sular üfunət yaradıb, bölgədə yoluxucu xəstəliklərin yayılma riski çox böyükdür. Təəssüf ki, ötən iki ayda icra başçısı Abdin Fərzəliyevə dəfələrlə şikayət olunub. İcra Hakimiyyətindən açıq deyilir ki, onlara pul ayrılmır deyə tədbir görə bilmirlər. Abşeron Su İdarəsinin isə sınıq-salxaq bir matoru var, bir gün qoşurlar, sonra xarab olur, çəkib aparırlar. FHN isə deyir ki, problemi yerli icra və bələdiyyə qurumları yaradıb, onlar əlac eləsin. Biz dəfələrlə Prezident Administrasiyasında, Heydər Əliyev Fondunda olmuşuq. Hər dəfə də bizə söz verilir ki, rayon İH başçısına tapşırıq verilib, həll olunacaq. Lakin görünən odur ki, Abdin Fərzəliyev, yaxud onun icra başçısı kimi protipi hesab olunan Nurlan Həsənovun ovdan, pul qazanmaqdan və şou xarakterli tədbirlərdən savayı heç nəyə vaxtları yoxdur”.
Masazır sakinləri deyir ki, bu həftə problem həll edilməsə, ailə üzvləri ilə Prezident Administrasiyasının qarşısına qədər yürüş edəcəklər: “Səsimizi başqa cür eşitdirə bilmirik. Biz düz 2 aydır evimizə gedə bilmirik, küçələrdə qalmışıq. Belə zülmmü olar?! Sizə təqdim etdiyimiz foto və videolara baxın, dözülməz vəziyyətdir”.
Sakinlər deyir ki, indi onları gölün ərazisində vaxtı ilə ev almaqda ittiham edənlər niyə həmin ərazidə ev tikib satanılanda, kor olublar: “O vaxt niyə susublar? Niyə buna şərait yaradıblar? Axı biz haradan biləydik ki, ora “Qotur”un qanunsuz qurudulmuş ərazisidir?…”.
Sakinlər onu da deyir ki, ərazidə tikilmiş hündürmərtəbəli binaların kanalizasiya suları da bu gölə axıdılır: “Bu boyda bina tikilməsinə icazə verən icra başçısı və müvafiq qurumlar bunların kanalizasiya xətlərinə niyə zamanında diqqət etməyiblər? Görünür, hamısı pulunu alıb, hər şeyə göz yumublar. Bunlardan dövlət marağı qoruyanmı olar? Bunlardır dövlətə və ölkə başçısına sədaqətlə qulluq edənlər?…”.
Sonda sakinlər dövlət başçısı cənab İlham Əliyev və Birinci xanım Mehriban Əliyevadan kömək istəyiblər: “Ümidimiz yalnız Sizədir. Əminik ki, səsimiz sizə yetissə, ərazidəki suların çəkilməsi və problemin daimi həlli istiqamətində yerli məmurlar əsaslı tədbirlər görəcəklər…”
