Bizimesr.com-un məlumatına görə, tenderin qalibi “Premyer Prodakşın” MMC olub və satınalmanın ümumi məbləği 96 min manat təşkil edib.
Tender sənədlərində qeyd olunur ki, qurban paylarının bayram günlərində 1600 ailəyə paylanması nəzərdə tutulub. Lakin ötən gün ölkənin diğər rayonlarında Qurban bayramı münasibətilə şəhid və imkansız ailələrə Qurban paylarının paylanmasının şahidi olduq. Doğrudur, bəzi rayonlarda bu olduqca urvatsız keçirilib, Cəlilabad rayonunda qurd basmış ətlər şəhid ailələrinə verilib. Amma bütün bunlara baxmayaraq, Qurban bayramı tədbirləri keçirilib, RİH rəsmi saytlarında və sosial şəbəkə hesablarında məlumat paylaşılıb.
Amma, Abşeron Rayon İcra Hakimiyyəti tərəfindən bu tədbirin keçirilib-keçirilmədiyi, vəsaitin necə xərcləndiyini təsdiqləyən hər hansı rəsmi məlumat yayımlanmayıb. Maraqlıdır ki, rayon icra hakimiyyətinin rəsmi internet səhifəsində və sosial şəbəkə hesablarında keçirilən digər tədbirlər, görüşlər və aksiyalarla bağlı mütəmadi məlumatlar paylaşılır. Amma məhz 96 min manatlıq Qurban bayramı tenderi və paylanması nəzərdə tutulan sovqatlarla bağlı nə bir xəbər, nə görüntü, nə də hesabat təqdim olunub.
Əgər doğrudan da 1600 ailəyə qurban payı çatdırılıbsa, niyə bununla bağlı hesabat verilmir? Niyə paylanma prosesini əks etdirən görüntülər, siyahılar və ya rəsmi açıqlamalar yoxdur? Dövlət büdcəsindən ayrılan vəsait hesabına keçirilən tenderlərin ictimaiyyətə açıq və hesabatlı şəkildə təqdim olunması vacibdir.
Digər tərəfdən, 96 min manat az vəsait deyil. Bu məbləğlə yüzlərlə qurbanlıq heyvanın alınması nəzərdə tutulub. Bayram ərəfəsində ölkədə heyvandarlıq bazarında qiymət artımı müşahidə olunduğu halda, belə iri həcmli satınalmanın hansı şərtlərlə həyata keçirilməsi də diqqət çəkən məqamlardandır.
Bu gün cəmiyyəti maraqlandıran əsas məsələ ayrılan vəsaitin həqiqətən ehtiyac sahibi ailələrə çatıb-çatmadığıdır. Çünki müxtəlif rayonlarda keçirilən oxşar tenderlər ətrafında narazılıqlar, keyfiyyətsiz məhsul iddiaları və şəffaflıq problemləri gündəmə gəlir.
Abşeron Rayon İcra Hakimiyyəti bu məsələyə aydınlıq gətirməli, ictimaiyyət qarşısında hesabat verməlidir. Dövlət vəsaiti hesabına keçirilən sosial layihələr gizli saxlanıla bilməz. Əksinə, şəffaflıq təmin olunmalı, vətəndaşlara ayrılan büdcənin hara və necə xərcləndiyi açıq şəkildə göstərilməlidir.
Əgər 96 min manatlıq tender həqiqətən məqsədinə uyğun icra olunubsa, bunun təqdim etmək çətin olmamalıdır. Əks halda, ortaya çıxan susqunluq və məlumat boşluğu ictimai etimadı sarsıdır.
Bizimesr.com
Soztv.az
