“Bakı-Tbilisi qatarına kupe üçün elan olunan 81 manat gözlənildiyi kimi, 125 manat oldu. Doğrudur, mən 120 manat gözləntimlə bağlı yazmışdım, 5 manat səhvə yol vermişəm. Ötən gecə ADY -nin Bakı – Tbilisi və Tbilisi – Bakı qatarının qiymətlərinə nəzər saldım. Elə gözlənildiyi kimidir”.
Mia.az xəbər verir ki, bu sözləri Rəqəmsal İnkişaf və Nəqliyyat Nazirliyi yanında İctimai Şura üzvü Osman Gündüz Feysbuk-dakı səhifəsində yazıb.
Onun sözlərinə görə, 27 və 28 may qiymətlərində rəsmi olaraq ən ucuz elan olunmuş 81 manatdan əsər-əlamət görünmür: “Kupe üçün qiymət 125 manat olub. Bu tarixlər üçün SV 180 manat görsənir. Lüks isə 277 manat. Bir ay sonra, 20/21 iyun üçün də 81 manat arxa plana keçib, qiymətlər Kupe üçün 93 manat görsənir. Beləliklə, gözlənildiyi kimi, ADY -nin qiymət siyasəti elə Bakı – Balakəndən fərqlənmədi”.
Ekpsert deyir ki, bu qiymətlər heç bir halda ağlabatan deyil: “Bir daha vurğulamaq istərdim ki, biz ADY-nin dəmir yol ekosistemin dirçəldilməsi, xüsusən də yükdaşımaların gücləndirilməsi istiqamətində səylərini görürük, dəyərləndiririk və təqdirəlayiq hesab edirik. Amma qiymət siyasətini də qüsurlu hesab edirik.
Yaxşı olar ki bu təbii inhisar subyekti sərnişindaşımaya subsidiya ayrılmasıyla bağlı Prezidentin fərmanına uyğun olaraq hökumətdən dəstək almaq üçün çalışsın, vuruşsun. Yükdaşımadan əldə olunan gəlirlərin daha da artırılması və bu vəsaitlərin sərnişindaşımaya yönləndirilməsi daha məntiqli olardı.
Bunlara yönəlmək əvəzinə, xərclərin sadə vətəndaşların üzərinə yönləndirilməsi, qiymətləri 3-4 dəfə qaldırmaq yolverilməzdir”.
Zaurpress.az
