Modem və marşrutlaşdırıcının konfiqurasiyası.
Söz tv xəbər verir ki, son zamanlar “AzTelekom” və “BakTelekom” internet şəbəkələrində qiymət artımı və keyfiyyətin dəyişməməsi ilə əlaqədar “Tiktok” platformasında istifadəçilər narazılıqlarını bildirmək üçün müxtəlif videolar çəkib paylaşırlar. Məsələn: Modemi balta ilə sındırırlar və yaxud yerə çırpırlar, modemin videosun çəkib müxtəlif səslərlə montaj edərək paylaşırlar və ya sözü gedən internet şəbəkəsindən imtina edərək digər internet şəbəkələrindən istifadə etdiklərini söyləyir, hətta bunu izləyicilərə tövsiyyə edənlərin sayı da az deyil.
Məsələ ilə bağlı “Bakı Telefon Rabitəsi” MMC – nin ictimaiyyətlə əlaqələr üzrə baş mütəxəssisi Alidə Mustafayeva ilə əlaqə saxladıq:
“Qeyd edək ki, internet xidmətinin təminatı istiqamətində tərəfimizdən hazırda kütləvi nasazlıq müşahidə olunmur. Fərdi ev təsərrüfatlarında texniki nasazlığın baş verməsi mümkündür. Belə hallarda abunəçilərin müraciəti əsasında internet xidmətində yaranan texniki nasazlıqlar nəzarətə götürülərək aradan qaldırılır.
İnternetin sürətinin zəifliyi ilə bağlı müraciətlərin qeydiyyatı zamanı problemlərin əsas 3 səbəbdən qaynaqlandığı müşahidə olunur. Həmin səbəblər aşağıdakılardır:
Cihazların uyğunluğu. İnternet sürətinin 100 Mbit/s olması üçün abunəçinin istifadə etdiyi cihazlar (kompüter, noutbuk, telefon və s.) bu sürəti dəstəkləməlidir. Əgər cihazın şəbəkə adapteri və ya Ethernet portu 100 Mbit/s və ya daha yüksək sürəti dəstəkləmirsə, real sürətin aşağı olması müşahidə olunur.
Modem və marşrutlaşdırıcının konfiqurasiyası. Modem və ya marşrutlaşdırıcının konfiqurasiyası düzgün aparılmadıqda internet sürəti məhdudlaşa bilər. Məsələn, modem köhnə versiyadadırsa və ya düzgün konfiqurasiya olunmayıbsa, yüksək sürətləri təmin edə bilməz. Həmçinin “Wi-Fi” marşrutlaşdırıcılarının bəzi parametrləri (kanal seçimi, bant genişliyi) düzgün qurulmadıqda “Wi-Fi” üzərindən internet sürətinin əhəmiyyətli dərəcədə azalması müşahidə olunur.
Dalğaların konfiqurasiya olunmaması. “Wi-Fi” dalğalarının yayılması ətraf mühitdən və istifadə olunan dalğa bantlarından asılıdır. Məsələn, 2.4 GHz bantı daha geniş əhatə dairəsini təmin etsə də, daha aşağı sürət təqdim edir və müdaxilələrə daha həssasdır. 5 GHz bantı isə daha yüksək sürət təmin etsə də, əhatə dairəsi məhduddur. Əgər bu dalğalar düzgün konfiqurasiya olunmayıbsa, internet sürəti azalacaq.
Yarana biləcək hər hansı texniki nasazlıqlarla qarşılaşdıqları halda “Aztelekom” abunəçilərindən “170”, “Baktelecom” abunəçilərindən isə “155” Çağrı Mərkəzinə müraciət etmələri xahiş olunur.”
Xatırladaq ki, “AzTelekom” MMC və “BakTelekom” MMC avqustun 15 – dən etibarən internetin minimal aylıq ödənişini 25 manata, sürətini isə 2,5 dəfə artırıb.
Xüsusi müxbir: İlkin Hüseynov
Soztv.az
