Milli Məclisin Səhiyyə komitəsinin sədri, akademik Əhliman Əmiraslanov Azərbaycan Milli Elmlər Akademiyasının illik Ümumi Yığıncağında çıxış edib.
O, hesabat ili ərzində Akademiyada və onun koordinasiya etdiyi elmi müəssisələrdə yüksək elmi-metodik səviyyəyə malik nəticələrin əldə olunduğunu bildirib. Qeyd edib ki, Biologiya və Tibb Elmləri Bölməsini (BTEB) əhatə edən institutlarda 2025-ci ildə biologiya, tibb, aqrar və ekologiya elmləri üzrə böyük elmi və praktik əhəmiyyət daşıyan çoxsaylı tədqiqat nəticələri əldə olunub.
Akademik Əhliman Əmiraslanov tibb sahəsində qazanılmış mühüm elmi nailiyyətlərdən bəhs edərək bildirib ki, qlobal səhiyyə sistemində gedən sürətli inkişaf prosesləri Azərbaycandan da yan keçməyib. O, Azərbaycan Respublikası Prezidenti cənab İlham Əliyevin ölkədə səhiyyənin inkişafına böyük diqqət ayırdığını vurğulayıb. Bildirib ki, 2025-ci ilin payızında ilk dəfə meyit donordan ürək nəqli əməliyyatının həyata keçirilməsi Azərbaycan səhiyyəsi və elmi üçün tarixi hadisədir. Alim bu əməliyyatların sayının artmasının gələcəkdə həmin istiqamətdə fundamental və tətbiqi elmi tədqiqatların genişlənməsinə imkan yaradacağına əminliyini ifadə edib.
Səhiyyə komitəsinin sədri, həmçinin dövlət başçısının dəstəyi və Milli Onkologiya Mərkəzinin baş direktoru, akademik Cəmil Əliyevin təşəbbüsü ilə Azərbaycanda Nüvə Təbabəti Mərkəzinin yaradılmasının xərçəng xəstəliklərinin erkən diaqnostikasında mühüm rol oynadığını bildirib.
O, çıxışında minimal invaziv cərrahiyyə, reproduktiv təbabətdə yüksək texnologiyalar və kök hüceyrə tətbiqləri, robotik-cərrahi üsullar, eləcə də uşaqlarda bronxial astma üzrə müasir yanaşmalar barədə də məlumat verib.
Akademik Əhliman Əmiraslanov qeyd edib ki, hesabat dövründə Biologiya və Tibb Elmləri Bölməsinə daxil olan elmi müəssisələr tərəfindən yüksək indeksli jurnallarda ümumilikdə 725 elmi məqalə dərc olunub. Onlardan Web of Science və Scopus bazalarına daxil olan jurnallarda çap edilən 457 məqalə tibb yönümlü elmi-tədqiqat və təhsil müəssisələrinin payına düşüb. Bu, Azərbaycan elminin beynəlxalq miqyasda mövqeyini əks etdirən mühüm göstəricilərdir və “elmin güzgüsü” hesab edilə bilər.
Elmi məktəblərin qorunub saxlanılması məsələsinə də toxunan akademik Əhliman Əmiraslanov ölkəmizdə dərin elmi ənənələrə malik elmi məktəblərin mövcud olduğunu söyləyib. Bildirib ki, elmi məktəbin yaradılması və onun ənənələrini davam etdirəcək peşəkar kadrların yetişdirilməsi son dərəcə mürəkkəb və uzunmüddətli prosesdir. Bu baxımdan, istər AMEA, istərsə də Elm və Təhsil Nazirliyi tərəfindən ölkəmizdə mövcud elmi məktəblərə xüsusi diqqət yetirilməli, onların davamlılığı və elmi ardıcıllığı qorunmalıdır.
Alim elmi potensialın ölkə üçün strateji əhəmiyyət kəsb edən yeni tədqiqat istiqamətlərinə yönəldilməsinin zəruriliyini də diqqətə çatdırıb. Bu kontekstdə post-müharibə dövründə baş verən proseslərin sosial-psixoloji aspektdən daha dərindən öyrənilməsinin xüsusi aktuallıq kəsb etdiyi bildirib. Qeyd edib ki, əhali arasında formalaşmış psixo-sosial problemlər, travmalar, demoqrafik dəyişikliklər, diaqnostika və müalicə məsələləri üzrə elmi tədqiqatların aparılması olduqca önəmlidir.
Sonda akademik Əhliman Əmiraslanov hesabat ili ərzində ölkədə elm sahəsində mühüm işlərin görüldüyünü, ciddi uğurların əldə edildiyini vurğulayaraq hesabatı yüksək qiymətləndirib və bu nailiyyətlərin gələcək elmi inkişaf üçün möhkəm zəmin yaratdığını bildirib.
