İndiki etiraz aksiyalarının mahiyyətinə gəlincə, düşünürəm ki, onlar 1979-cu il inqilabından sonra formalaşmış respublika siyasi elitasının iki hissəsi arasında mübarizə prosesini başladacaq və ya daha çox ictimailəşdirəcək.
Soztv.az xəbər verir ki, bu sözləri sabiq xarici işlər naziri Tofiq Zülfüqarov İrandakı kütləvi etiraz aksiyaları və iğtişaşlar haqda qeyd edib.
O bildirib ki, Xomeini sürgündən qayıtdıqdan sonra dini (ruhani) elita formalaşdı və idarəetmə sisteminə inteqrasiya olundu:
“Bir neçə il ərzində ardıcıl surətdə ideoloji, hakimiyyət və iqtisadi institutların dublikatları formalaşdı, onlar son illərdə bütün maliyyə axınlarını tamamilə inhisara aldılar və nəticədə bütün sahələrdə tam hökmranlığı təmin etdilər. Prezidentlik institutu, sahə nazirlikləri, bəzi qanunverici orqanlar və yerli özünüidarəetmə strukturları öz səlahiyyətlərini və hökumətin üstünlüklərini saxlamaq üçün mübarizəni davam etdirirdilər. Daxili müxalifət kimi çıxış edən dünyəvi respublika elitası bu gün küçə etirazlarından istifadə edərək və üstüörtülü şəkildə rəhbərlik edərək Rəhbərin sülalə hakimiyyətinin ötürülməsi cəhdinin qarşısını almağa çalışır. Bu gün əsas məqsəd din xadimlərini dünyəvi dövlət hakimiyyətindən uzaqlaşdıran, ehtimal ki, konstitusiya dəyişiklikləri ilə SEPAH-ın zərərsizləşdirilməsidir. Ümumiyyətlə, İran Sinodunu dağıtmaq və Patriarxa çevirmək lazımdır. Vatikanın mirası tarixə çevrilməlidir”.
