ABŞ lideri Donald Trampın Rusiya ilə bağlı son açıqlamaları Kreml və Putinə bağlı təbliğat aparatında rezonans doğurub.
Tramp Rusiyanı “kağız pələng” adlandırıb, Ukraynanın 1991-ci il sərhədlərini müharibə ilə bərpa edəcəyini vurğulayıb; Rusiyanın bu müharibədə ciddi hərbi-iqtisadi-sosial-siyasi itkilər verdiyini ilk dəfə bu cür açıq şəkildə etiraf edib.
Tramp ilk dəfə elan edib ki, supergüc Ukrayna məsələsini hərbi yolla bir həftəyə həll edərdi, 4 ilə yaxındır Ukraynanın öhdəsindən gələ bilməyən ölkə supergüc deyil, “kağız pələng”dir.
Bu, Trampın hakimiyyətə qayıtdığı 8 ay 5 gün, seçki ərəfəsində və seçkidə qələbəsindən sonrakı dövrü götürsək, 1 ildən çox müddətdə Rusiyanın ünvanına işlətdiyi ən sərt sözlərdir. Halbuki Tramp müharibəni bitirmək üçün Rusiyanın tələblərini Ukraynaya qəbul etdirməyə çalışırdı, hətta Zelenskini Ağ Evdə aşağılamaqdan da çəkinməmişdi – tarixi mübahisə hər kəsin xatirindədir.
Buna cavab olaraq Rusiya 2 gündür müxtəlif konfiqurasiyalar, siyasi labirintlər qurur. Məsələn, Peskov deyir ki, Tramp Zelenski ilə görüşün və Ukrayna liderinin “şişirdilmiş” informasiyalarının təsiri altında elə danışıb – yəni Tramp əslində elə düşünmür!
Kreml sözçüsünün bu mövqeyindən sonra rus aqressiv hərbi-siyasi maşınının təbliğat vintcikləri də ortaya atılıb, Trampın işlətdiyi ifadənin doğurduğu rezonansı yumşaltmaqla məşğuldurlar. Ancaq hər kəsə sanki göstəriş verilib: heç bir halda Trampın əleyhinə kəskin ifadələr işlətmək olmaz!
Trampın xarakterini hamıdan əvvəl KQB analiz eləmişdi: özünəvurğundur, tərifi sevir və onu tərifləməklə, şəninə mədhiyyələr döşəməklə ABŞ kimi nəhəngin dəstəyini qazanmaq olar!
Bu siyasəti artıq dünyanın bütün ölkələri aparır və Kreml bunu müşahidə etdiyi üçün daha ehtiyatlı, daha qorxaq davranmağa başlayıb – Trampın tənqidi ilə bağlı bircə cümləni belə eşitmək, görmək istəmir və bu mövqeyini piarçıları sədaqətlə yerinə yetirirlər.
Ancaq Trampın mövqeyinin dəyişməsi yalnız Avropa liderlərinin (təbii ki, başda Zelenskinin) sözünün əvvəlində, ortasında və sonunda ABŞ liderinə təşəkkür etməsi ilə bağlı deyil, bəzi reallıqlar da var.
1. Ukrayna artıq sərhədindən 1400 km-dan çox məsafədə, Rusiyanın dərinliklərinə hücum edə bilir;
2. Ukrayna son 3 gündə Krımda Rusiyanın 4 təyyarəsini ( 2 ədəd B-12 “Çayka”, 2 ədəd An-26) sıradan çıxarıb;
3. Ukrayna son bir ayda 160 kv.km ərazisini işğaldan azad edə bilib;
4. Ukrayna Rusiyanın NEZ-lərini ardıcıl hədəfə ala bilir;
5. Ukrayna artıq öz silah istehsalını sürətlə artırıb, ölkə nəhayət, hərbi relsə düşməkdədir və Avropa indi bu məsələdə Kiyevə daha böyük sərmayələr yatırır…
Həmçinin:
1. Rusiyanın ÜDM-i sürətlə kiçilir;
2. Rusiyada hava limanları artıq daha tez-tez bağlanır – ölkənin hava nəqliyyatı iflic olur;
3. Rusiya büdcəni doldurmaq üçün ƏDV-ni 22%-ə qaldırır;
4. Rusiyanın neft və qazdan gəlirləri sürətlə azalır;
5. Rusiya Şimali Koreya və Çindən daha çox asılı vəziyyətə düşür və s.
Ukrayna ilə bağlı hərbi-siyasi vəziyyət sürətlə dəyişir və dəyişməyə də davam edəcək: müharibə daha 1-2 il davam edərsə, Avropa Rusiya neft-qazından tamamilə imtina edəcək, Ukrayna isə tam mənasında hərb maşınına çevriləcək – Avropanın bütün hərbi yenilikləri Ukraynada tətbiq ediləcək.
Ona görə Trampın son xəbərdarlıqları və kəskin mövqe dəyişməsi təsadüf deyil – Rusiya hərbi imkanlarından qat-qat çoxuna iddia edir və bu da qəbul olunmur. Öz iddiasını meydanda qəbul etdirməyə girişən Rusiya isə getdikcə daha ciddi müqavimətlə üz-üzədir.
