Bu şikayətlə Bizim.Media-ya Naxçıvan Dövlət Universitetinin müəllimi Günay Məmmədova müraciət edib. Onun sözlərinə görə 5 ildir övladı onkoloji xəstəlikdən əziyyət çəkir və 3 aydan bir Naxçıvan Muxtar Respublika Xəstəxanasında qan təhlillərindən keçir. Amma uzun müddətdir ki, xəstəxanada qan təhlilləri ödənişlidir:
“3 aydan bir övladımı xəstəxanaya aparıb müayinələrdən keçirirəm. Maaşımızdan sığorta pulu tutulur. Həmçinin onkoloji xəstələr haqqında Dövlət Proqramı mövcuddur. Ancaq, buna baxmayaraq analizlər ödənişlidir. Bir analiz üçün 7 manat tələb edilir. 5-6 qan nümunəsindən analiz veriləndə 35-40 manat pul edir. Axı problem tək bununla da bitmir. Dəfələrlə aidiyyəti qurumların rəsmi səhifələrinə müraciət ünvanlamışam. Amma cavab yoxdur. Tək mən deyiləm, bu problemlə bağlı şikayət edənlər çoxdur”.
Məsələ ilə bağlı “Naxçıvan Muxtar Respublikasının Tibb Müəssisələrinin İdarəetmə Birliyi”nə müraciət etdik. Amma, sözügedən qurum məsələ ilə bağlı heç bir açıqlama verməyəcəyini bildirdi.
Məlumat üçün bildirək ki, 2006-cı ildə qəbul edilən “Onkoloji yardım haqqında” qanunun 4-cü maddəsinin 4.3 bəndində qeyd edilib ki, hər bir Azərbaycan vətəndaşı olan onkoloji xəstənin tibbi yardımı dövlət tibb müəssisələrində dövlət büdcəsi vəsaiti hesabına həyata keçirilir. Elə həmin qanunun 12-ci maddəsinin 12.1 bəndində onkoloji xəstələrin dövlət tibb müəssisələrində müayinə və müalicəsi üzrə tədbirlərin dövlət büdcəsi vəsaiti hesabına maliyyələşdirildiyi yazılıb. Bu qanunların icrası üçün dövlət büdcəsindən 2007-ci ildən vəsait ayrılır.
Səhiyyə Nazirliyinin mütəxəssis-eksperti, onkoloq Azad Kərimlinin açıqlamasına görə 2023-cü ilin statistik məlumatlarına əsasən, hazırda ölkədə rəsmi olaraq 69 min 435 nəfər onkoloji xəstə kimi qeydiyyatdadır.
Şübhəsiz ki, 2024-cü ildə bu statistika da artıb…
Ümumdünya Səhiyyə Təşkilatının proqnozlarına görə, 2050-ci ilə qədər hər il 35 milyon xərçəng xəstəsi qeydə alınacaq.
