Xaçmaz rayon Əhmədoba kənd sakinləri rayon icra hakimiyyəti başçısının və digər məmurların fəaliyyətsizliyindən, edilən şikayətləri qulaqardına vurmalarından narazılıq edir. “Dia.az” xəbər verir ki, bu barədə sosial şəbəkələrdə məlumat paylaşan kənd sakinləri adından edilən müraciətdə deyilir:
“Bələdiyyə seçkiləri keçiriləndə sevindik ki, bəlkə seçki xətrinə yollara nəsə əncam edələr. Amma olmadı. Namizədlər elə arxayın idilər ki, onları camaatın dərdi-səri maraqlandırmadı da… Heç camaat da seçkiyə gedib kiməsə səs vermədi də..
Əvəzində problemlərimiz qaldı.
Əhmədobanın bir nömrəli problemi yoldur. Başçıya demişik… amma nə olsun… Elnur Rzayevin yanındakı məddah ordusu aman vermir… Ya da başçının özü heç iş görmək istəmir…
Yaxşı ki, bu qış o qədər də soyuq olmadı. Düzdür, təsərrüfatımıza ziyandır. Amma qaz olmayan Əhmədoba kəndi üçün soyuq qış da bir ayrıca problemdir. Meşələri qırmaq məcburiyyətindədir bu camaat. Çünki odundan başqa yandırmağa, isinməyə bir şey yoxdur…”
Sakinlər iddia edir ki, dədəflərlə yerli icra qurumlarına müraciət ediblər, lakin onların səsinə kimsə səs verməyib:
“Biz elə başa düşürük ki, Əhmədoba Xaçmazın rəhbərliyinin yadından birdəfəlik çıxıb…”
Dia.az
