Baş vermiş ölüm faktı ilə bağlı Oxu.Az-a danışan uşağın anası Əfsanə Hacıyeva bildirib ki, yanvarın 27-si axşam saat 6 radələrində qızının vəziyyəti anidən pisləşib:
“Qızımın hansısa xəstəliyi olmayıb. Vəziyyəti anidən pisləşdi. Ürəkbulanma, qusmadan sonra göyərməsi oldu və huşunu itirdi. Bundan sonra təcili tibbi yardıma zəng etdik. 40 dəqiqə gözlədik. Təcili yardım gəlmədi, özümüz uşağı Maştağadakı xəstəxanaya apardıq. Orada uşağa ilkin yardım göstəriləndən sonra təcili tibbi yardımla Respublika Klinik Xəstəxanasına apardıq. Orada da ilkin yardım olundu, amma dedilər ki, MRT müayinəsi sabah mümkün olacaq. Biz bundan sonra uşağın pisləşməsinin səbəbini öyrənmək üçün bütün klinikaları gəzdik ki, boş yer tapaq, görək, əlacı nədir? Sonra düşündük ki, özəl klinika daha yaxşı olar və “Məlhəm” klinikasında yer tapıb ora yerləşdirdik”.
Ana bildirib ki, uşağı “Məlhəm” klinikasında əməliyyat olunub:
“Beyin əməliyyatından sonra həkim bizə dedi ki, bir az irəliləyiş var. Belə davam etsə, yaxşı olacaq. Səhəri gün isə vəziyyəti yaxşı olmadı. Balamın nədən öldüyünü heç bilmədik”.
Ana deyib ki, təcili tibbi yardımın gecikməsindən şikayətçidir:
“Təcili yardım vaxtında gəlsəydi, bəlkə uşağım yaşayardı. Təcili yardım gəlirik, çatırıq dedi, oturub onu gözlədik, amma gəlmədilər”.
Qeyd edək ki, təcili yardımın gecikmə səbəbi ilə bağlı Tibbi Ərazi Bölmələrini İdarəetmə Birliyinə (TƏBİB), uşağın ölüm səbəbi ilə bağlı “Məlhəm” klinikasına sorğu ünvanlamışıq.
