“Ötən il dekabrın 25-də Rusiya səmasında Azərbaycanın sərnişin təyyarəsinin vurulması ətrafındakı müzakirələrdə məni ən çox narahat edən bir vaxtlar özünü Azərbaycanın dostları kimi tanıdan Rusiya politoloq və ekspertlərinin gün kimi aydın olan bu məsələdə qorxaqcasına susmasıdır. Buna görə də biz həqiqi dostlarımızın və düşmənlərimizin kimlər olmasını bilməliyik”.
Hərbi-siyasi ekspert Üzeyir Cəfərov bunu Moderator.az-a açıqlamasında 2024-cü il dekbrın 25-də Azərbaycan təyyarəsinin Rusiya səmasında Rusiya hərbçiləri tərəfindən vurulması cinayətinin açılması, cinayətkarların cəzalandırılması, həlak olan sərnişinlərin ailıələrinə kompensasiya ödənilməsi və s. ilə bağlı fikirlərini bildirərkən belə deyib.
“Ötən il dekabrın 25-də Azərbaycan sərnişin təyyarəsinin məhz Rusiya tərəfindən vurulmasıyla bağlı mənim ilk günlərdən heç bir şübhəm və ya başqa fikrim olmayıb. Bunu artıq Braziliyada şifrələnərək qaytarılmış “qara” qutunun yazıları da sübut edib və demək olar ki, bu cinayət açılıb. O ki qaldı Rusiyanın inadkarlıq göstərməsinə və sonuncu dəfə Rusiya xarici işlər nazirinin müavini Qaluzinin Azərbaycanın Rusiyadakı səfiri Rəhman Mustafayevi sorğu-suala çəkməsinə – bunlar hamısı Kreml tərəfindən atılan yersiz addımlardır. Rusiya təyyarəmizlə bağlı törətdiyi cinayətə görə cəzalandırılmalıdır, Azərbaycan xalqından rəsmən ictimai şəkildə üzr istəməlidir və həlak olanların ailələrinə kompensasiya ödəməlidir…
Və onu da deyim ki, kompensasiya yalnız həlak olan vətəndaşlarımıza görə deyil, həmçinin “AZAL”-ın məhv edilmiş təyyarəsinə görə də ödənilməlidir. Artıq bu haqda Azərbaycan siyasi rəhbərliyi də öz fikrini bildirib”, – deyə davamında ekspert bildirib.
“Mən də hesab edirəm ki, bu cinayəti törədənlər artıq bəllidir və həmin şəxslər mütləq mənada cinayət məsuliyyətinə cəlb edilməlidir. Və Moskvanın bu cinayətə görə həm açıq, rəsmi formada üzr istəyəcəyinə və kompensasiya ödəyəcəyinə zərrə qədər də şübhə etmirəm…
Düzdü, Rusiya oxşar hallarda dəfələrlə inadkarlıq göstərib. Biz bunu Ukrayna səmasında Malayziya təyyarəsinin vurulması, Polşa prezidentinin təyyarəsinin Rusiya səmasında məqsədyönlü şəkildə qəzaya uğradılmasından və s. sonra da görmüşük. Lakin “AZAL”-ın təyyarəsinin vurulmasıyla bağlı tamam fərqli bir mənzərə yaranıb. Ona görə də Kremlin tez bir zamanda öz cinayətini etiraf edəcəyini düşünürəm. Çünki başqa variant yoxdur, hər şey gün kimi aydındır. Bu mövzuda Rusiyanın dezinformasiyaları, Lavrovun yalanları, o cümlədən Putinin mətbuat katibi Peskovun özünü bilməzliyə vurması, Rusiya XİN rəsmisi Zaxarovanın hədyanları isə keçərli deyil”,- Üzeyir Cəfərov belə deyib.
“Sərnişin təyyarəmizin vurulması ətrafındakı müzakirələrdə məni ən çox narahat edən bir vaxtlar özünü Azərbaycanın dostları kimi tanıdan Rusiya politoloq və ekspertlərinin gün kimi aydın olan bu məsələdə qorxaqcasına susmasıdır. Buna görə də biz həqiqi dostlarımızın və düşmənlərimizin kimlər olmasını bilməliyik.
Onu da qeyd etmək istəyirəm ki, bu gün çox ciddi proseslər baş verir. Və hesab edirəm ki, əgər Rusiya Azərbaycanı itirmək istəmirsə, həm təyyarəmizin vurulması məsələsində, eyni zamanda bundan əvvəl Qarabağ məsələsi ilə bağlı etdiyi cinayət və səhvləri etiraf edərək xalqımızdan, dövlətimizdən üzr istəməlidir. Yalnız o halqda Kremlin bizə qarşı səmimi münasibətindən danışmaq olar…
Və bir daha nəzərə çatdırıram ki, təyyarəmiz məqsədyönlü şəkildə vurulub. İndiyədək də Moskva tərəfindən müxtəlif çaşdırıcı addımlar atılır, müxtəlif dezinformasiyalar yayılırdı ki, Rusiya bu cinayəti öz üzərindən atsın. Şükürlər olsun ki, bizim qazax dostlarımız da bu məsələdə sonadək məsuliyyətlərini dərk etdilər və Qazaxıstan Rusiyanın məsuliyyətdən yayına bilməyəcəyini bir daha bəyan etdi. Və bu yalnız Qazaxıstan rəsmilərinin yox, həm də Qazax xalqının mövqeyidir. Buna da mən şəxsən sevinirəm”, -deyə – ekspert diqqətə çatdırıb.
