“Zahid Oruc deyib ki, sərhədlərin açılması Rusiya-Ukrayna müharibəsindən 100 minlərlə qeyri-azərbaycanlı qaçqının ölkəmizə axını ilə nəticələnəcək. Birincisi, Zahid müəllimə təşəkkür düşür, adam etiraf edir ki, virus, karantin yoxdur, sərhədləri bu məsələlərə görə bağlı saxlamırıq. Halbuki, son 2 ildə Zahid müəllimin “tale ortaqlarının”, yəni deputatların bir çoxu canlı yayımda debatlar vaxtı üzümüzə dururdular ki, sərhədlər məhz virusa görə bağlıdır. İkincisi, Zahid müəllimin özünəməxsus “məntiqi” var, debata da gəlmir ki, orutub-danışaq: Müharibə 2,5 ildən çoxdur ki, davam edir. Bu dövrdə Ukraynanın da, Rusiyanın da sərhədləri açıqdır, Ukraynalılar Avropanı qoyub Azərbaycana niyə gəlsinlər ki, zatən orada onlara maddi yardım verirlər, pulsuz təhsil-tibb xidməti alırlar. Rusiyanın Qazaxıstan, Belarus, Gürcüstanla (vizasız gediş-gəliş olan ölkələr) quru sərhədləri açıqdır. Müharibən qaçan çoxdan qaçıb, gedən-gedib, qalan-qalıb, Zahid müəllim elə bilir ki, hamı Azərbaycana AzTV-dən baxır, həsəd aparır, bura can atır, hamı Qazaxstanla 7,2 min kilometr açıq quru sərhədi qoyub, elə Azərbaycana gəlmək üçün dua edir və ya hamı Gürcüstana yox, elə Azərbaycana gəlmək istəyir”.
Hurriyyet.az-ın xəbərinə görə, bunu iqtisadçı Natiq Cəfərli bildirib.
N.Cəfərli quru sərhədlərin bağlı saxlanılmasının səbəbini açıqlayıb: “Hökumət qeyri-qanuni və anti-konstitutsion yolla ölkədən valyuta çıxışını, sərhədyanı ticarəti məhdudlaşdırır. Çünki primitiv və inhisarlaşmış iqtisadi modeldə bu hökumət iqtisadi qaydalarla, məntiqlə, rəqabətlə davrana bilmir, hər məsələdə “aləti” qadağalardır. Hətta manatın məzənnəsini belə əmrlə saxlayırlar, anlamırlar ki, məzənnə siyasəti iqtisadi məsələdir, ekonomik yolla da tənzimlənməlidir. Bu məsələdə nə qədər çox sıxsalar, sonra bir o qədər böyük məzənnə itkiləri olacaq”.
Soztv.az
