Kutaisi kriminal qruplaşmasının ən tanınmış simalarından biri, kriminal aləmdə “Çiko” ləqəbi ilə tanınan Teymuraz Qoqolaşvili Türkiyədə vəfat edib.
Musavat.com bildirir ki, Qoqolaşvili avqustun 15-də Trabzonda, 69 yaşında dünyasını dəyişib.
Onun cənazəsinin Kutaisiyə aparılacağı və dəfn mərasiminin avqustun 28-də keçiriləcəyi bildirilir.
Teymuraz Qoqolaşvili 13 iyul 1957-ci ildə Gürcüstanın Kutaisi şəhərində anadan olub. Kriminal mənbələr onun 1978-ci ildə, ilk məhkumluğundan sonra Kutaisidə keçirilən toplantıda “qanuni oğru” elan edildiyini yazır. Həmin mərasimin Leo Qoçelaşvilinin qızının toyuna təsadüf etdiyi bildirilir.
Qoqolaşvilinin kriminal karyerası sovet dövründən başlayıb. Açıq mənbələrdə onun ümumilikdə altı dəfə məhkum olunduğu, dörd məhkumluğunun SSRİ, ikisinin isə Rusiya dövrünə təsadüf etdiyi qeyd olunur. 1995-ci ildə Tverdə silah işi üzrə, 2007-ci ildə isə Moskvada narkotiklə bağlı cinayət işi üzrə saxlanıldığı bildirilir. Qoqolaşvilinin fəaliyyəti Azərbaycan kriminal aləmindən tamamilə kənarda olmayıb. Əksinə, açıq mənbələr onun bir sıra azərbaycanlı mənşəli kriminal avtoritetlərlə eyni mühitdə və eyni toplantılarda yer aldığını göstərir. Məsələn, Qoqolaşvilinin bioqrafiyasında 1982-ci ildə Novosibirsk vilayətində çəkilmiş fotoda onun “Robert Bakinski” ləqəbli Robert Həsənovla birlikdə olduğu göstərilir. Bu, “Çiko”nun Azərbaycan kriminal mühiti ilə təmasının ən erkən sənədləşdirilən nümunələrindən biri kimi təqdim olunur. Daha sonrakı illərdə isə onun yolları Azərbaycanın kriminal tarixinin ən tanınmış adlarından biri – Rövşən Caniyevlə, yəni “Rövşən Lənkəranski” ilə kəsişib.
Məlumata görə, 22 sentyabr 2006-cı ildə Moskvada keçirilən əməliyyat zamanı Teymuraz Qoqolaşvili ilə “Rövşən Lənkəranski” də daxil olmaqla bir qrup “qanuni oğru” saxlanılıb. Həmin siyahıda Gürcüstan və digər postsovet ölkələrindən olan kriminal avtoritetlərin də adları çəkilir.
2011-ci ildə isə Rusiyanın Moskva vilayətindəki Kolomna həbsxanasından yayılan kriminal müraciətdə Qoqolaşvilinin adı “Rövşən Lənkəranski” ilə birlikdə çəkilib. Sənəddə hər iki şəxsin imzasının olduğu bildirilir. Bu fakt onların ən azı həmin dövrdə eyni kriminal çevrədə və eyni mövqedə çıxış etdiklərini göstərir.
Digər maraqlı məqam 2007-ci ildə Qoqolaşvilinin Moskvanın “Butırka” istintaq təcridxanasına göndərilməsi ilə bağlıdır. Həmin dövrdə onunla eyni təcridxanada “Vaqif Bakinski” kimi tanınan Vaqif Süleymanovun da olduğu qeyd edilir. Lakin bu fakt onların arasında ayrıca şəxsi və ya kriminal münasibətin mövcudluğunu sübut etmir.
Qoqolaşvili xüsusilə Kutaisi kriminal klanının əsas simalarından biri kimi tanınırdı. Onun adı uzun illər postsovet məkanında fəaliyyət göstərən gürcü, azərbaycanlı və digər millətlərdən olan kriminal avtoritetlərlə eyni siyahılarda çəkilib. Mənbələrdə onun ailəsində də kriminal aləmdə tanınan şəxslərin olduğu bildirilir. Kiçik qardaşı Murman “Kennedi”, əmisi oğlu isə Oleq “qanuni oğru” kimi təqdim olunur.
Qoqolaşvilinin qardaşı oğlunun – Reziko “Kennedi”nin də gələcəkdə kriminal aləmdə status ala biləcək şəxslər sırasında olduğu iddia edilir. Qoqolaşvilinin adı son illərdə də kriminal toplantılar və müxtəlif ölkələrdə keçirilən görüşlərlə bağlı xəbərlərdə çəkilib. 2022-ci ildə onun İstanbul hava limanında saxlanılması barədə də məlumat yayılmışdı. Beləliklə, Teymur “Çiko”nun ölümü postsovet kriminal aləminin köhnə nəslinin daha bir tanınmış nümayəndəsinin sıradan çıxması kimi qiymətləndirilir. Onun Azərbaycan kriminal mühiti ilə bağlılığı isə əsasən “Rövşən Lənkəranski”, “Vaqif Bakinski” və “Robert Bakinski” kimi adlarla eyni kriminal çevrədə və müxtəlif dövrlərdə kəsişən yollarla sənədləşir.
