Müşfiq Məmmədlinin vəzifədən getməsinin əsas səbəbi…
“AzərGold” QSC-də müşavir vəzifəsində çalışdığı bildirilən Müşfiq Məmmədlinin vəzifəsindən kənarlaşdırıldığı barədə məlumatlar yayılıb.
Məlumatın ictimaiyyətə açıqlanması qurumun satınalma prosesləri ilə bağlı yeni müzakirələrə səbəb olub.
İddialara görə, bu qərar “AzərGold” QSC-nin həyata keçirdiyi iri həcmli tender layihələri fonunda qəbul edilib. Xüsusilə büdcəsinin yüz milyonlarla manat olduğu bildirilən “Tülallar mədənində qazma-partlayış işlərinin və daşınma xidmətinin satın alınması” tenderi ətrafında müxtəlif iddialar səsləndirilir.
Yayılan məlumatlarda “AzerMining” MMC-nin həmin tenderdə qalib gələcəyi ilə bağlı ehtimalların gücləndiyi, şirkətin isə Müşfiq Məmmədli və onun qardaşı Cavid Məmmədli ilə əlaqələndirildiyi iddia olunur. Eyni mənbələrdə Məmmədli qardaşları ilə əlaqəsi olduğu bildirilən bir sıra şirkətlərin də adı çəkilir.
İddialarda bildirilir ki, bəzi satınalma proseslərində tender şərtlərinin müəyyən şirkətlərin xeyrinə formalaşdırıldığı, rəqabət görüntüsünün yaradılması məqsədilə əlaqəli şirkətlərin iştirak etdiyi və qaliblərin əvvəlcədən müəyyənləşdirildiyi ehtimal olunur. Həmçinin bəzi rəqib şirkətlərin tender proseslərindən müxtəlif üsullarla kənarlaşdırıldığı da iddia edilir.
Məlumatlarda diqqət çəkən digər məqam isə iri layihələr üzrə yekun qərarların aylarla gecikdirilməsi ilə bağlıdır. İddia olunur ki, bu vəziyyət mədənlərin vaxtında istismar edilməməsinə və nəticədə iqtisadi itkilərin yaranmasına səbəb ola bilər.
Qeyd olunur ki, Məmmədli qardaşları ilə əlaqələndirilən şirkətlər arasında “Bert” MMC, “Azdağmədən” MMC, “Azdağmədənistismar” MMC, “Resource Planning” MMC, “AT Geotech” MMC, “AzerMining” MMC və “AT Geotech Lab” MMC-nin adları çəkilir.
Mövzu ilə bağlı daha bir iddia Kəlbəcərin Söyüdlü (Zod) yatağında həyata keçirilməsi planlaşdırılan və büdcəsinin yüz milyonlarla manat olduğu bildirilən layihə ilə əlaqədardır. Məlumatlarda həmin tender ətrafında da müəyyən dairələrdə əvvəlcədən qalibiyyətlə bağlı fikirlərin səsləndirildiyi vurğulanır.
Məsələ ilə bağlı “AzərGold” QSC-nin və adı hallanan şəxslərin mövqeyi hələlik məlum deyil. Qarşı tərəfin mövqeyini dərc etməyə hazır olduğumuzu bildiririk.
Qeyd edək ki, məqalədə yer alan bütün məlumatlar müxtəlif mənbələr tərəfindən səsləndirilən iddialardır və onların hüquqi qiymətləndirilməsi aidiyyəti dövlət qurumlarının səlahiyyətindədir.
xalq.online
