Qırğızıstan Prezidenti Sadır Japarov və iranlı həmkarı Məsud Pezeşkian arasında telefon danışığı olub.
Məlumata görə, İran tərəfinin təşəbbüsü ilə baş tutan telefon danışığı zamanı Məsud Pezeşkian və Sadır Japarov ikitərəfli əməkdaşlıq məsələlərini müzakirə ediblər.
Liderlər qarşıdan gələn Qurban bayramı münasibətilə bir-birini təbrik edərək, xalqlara sülh və firavanlıq arzulayıblar.
Söhbət zamanı Şanxay Əməkdaşlıq Təşkilatı (ŞƏT) çərçivəsində qarşılıqlı fəaliyyətə diqqət yetirilib. S.Japarov vurğulayıb ki, Qırğızıstan təşkilatın hazırkı sədri kimi ŞƏT-in dünyada sülhün, etimadın və konstruktiv əməkdaşlığın təmin edilməsindəki rolunun gücləndirilməsinə xüsusi önəm verir. Tərəflər bu il Qırğızıstanda keçiriləcək ŞƏT sammitinin yüksək səviyyədə təşkil olunmasının əhəmiyyətini qeyd ediblər.
Regional gündəliyə toxunan Qırğızıstan prezidenti dialoqun davam etdirilməsinin və bütün yaranan məsələlərin müstəsna olaraq siyasi-diplomatik yollarla həllinin vacibliyini diqqətə çatdırıb. Qırğızıstan tərəfi Yaxın Şərqdə sabitliyin tezliklə bərpa olunacağına ümidvar olduğunu ifadə edib.
Sonda dövlət başçıları Qırğızıstan-İran münasibətlərinin dostluq və qarşılıqlı dəstək ruhunda daha da inkişaf etdirilməsində maraqlı olduqlarını təsdiqləyiblər.
Soztv.az
