Bakıda baş tutacaq növbəti möhtəşəm UFC turnirinin daha iki bəlli olan qarşılaşması idman həvəskarlarında böyük maraq doğurub.
Soztv.az “Ag Fight” portalına istinadən xəbər verir ki, gecənin ən çox diqqət çəkən əsas döyüşlərindən birində Dağıstanın məşhur döyüşçüsü Şarabuddin Maqomedov (Şara Bullet) braziliyalı rəqibi Mişel Pereyra ilə oktaqonu bölüşəcək.
Peşəkar karyerası boyunca çıxdığı 22 qarşılaşmanın 21-ni qələbə ilə başa vuran Maqomedov Bakı rinqində güclü və təcrübəli rəqibi ilə əsl sınaqdan keçəcək. Qeyd edək ki, braziliyalı Pereyra indiyədək keçirdiyi 47 döyüşdən 32-də rəqiblərini məğlub etməyi bacarıb.
Turnirin digər gərgin keçəcək qarşılaşmasında rusiyalı idmançı Andrey Pulyayev özbəkistanlı Nursulton Ruziboyevlə üz-üzə gələcək. Bu önəmli döyüşlə bağlı məlumatı Pulyayev şəxsi “Telegram” kanalı vasitəsilə izləyicilərinə çatdırıb:
“İyunun 27-də Bakıda Ruziboyevə qarşı döyüşəcəyəm. Hazırlıq üçün kifayət qədər vaxtım var, zədəmi tam sağaldıb rəqibə qarşı ciddi hazırlaşacağam”.
Xatırladaq ki, statistikaya əsasən, Pulyayev aktivindəki 14 döyüşün 10-da, Ruziboyev isə çıxdığı 47 qarşılaşmanın 36-da inamlı qələbə qazanıb.
Məlumat üçün bildirək ki, dünyanın ən nüfuzlu MMA təşkilatı olan UFC-nin Bakıdakı ilk turniri 2025-ci ilin iyunun 21-də təşkil olunub.
