Ramiz Mehdiyev və Maneələr Arxada Qaldı: Şuşa PFK İrəliləyir”
– ŞUŞA PFK Prezidenti Gülağa Bağırov Söz tv-nin jurnalistinin suallarını cavablandırır
Bu gün nə üçün çıxış edirsiniz?
Bu gün biz təkcə bir bayramı qeyd etmirik — Zəfərin özünü yaşayırıq. Azərbaycan xalqını Zəfər Gününə görə ürəkdən təbrik edirəm. Bu qürur və sevinc, neçə-neçə nəsillik həsrətimizin cavabıdır.
Komandanın yaranması barədə nə deyə bilərsiniz?
Bildiyiniz kimi, mən illər əvvəl də bu komandanı yaratmağa cəhd göstərmişdim. Qısa zamanda intizamlı, güclü və perspektivli bir futbol kollektivini formalaşdırdıq.
Lakin həmin dövrdə Ramiz Mehdiyevin rəhbərlik etdiyi siyasi mühitin sərt və qapalı strukturu, eləcə də bəzi yüksək vəzifəli və xarici təsirlərə həssas siyasətçilərin maneələri nəticəsində komandamız yarışlarda iştirak üçün lisenziya ala bilmədi. Komandanın inkişafı süni şəkildə dayandırıldı və bizə davam etməyə imkan verilmədi.
Bildiyiniz kimi, komandamız yarışlarda iştirak üçün lisenziya prosesini əvvəlcədən tamamlamışdı. Lakin son anda AFFA tərəfindən lisenziyanın verilməməsi hadisəsi baş verdi. Hətta Azərbaycanın keçmiş Baş prokurori mənə açıq şəkildə bildirmişdi ki, bu qərarın əsas səbəbi birbaşa Ramiz Mehdiyevdən gələn təsir və son dəqiqə zəngi olmuşdur.
O zaman da açıq şəkildə demişdim ki, ailə bağları və xarici təsirlərə həssas siyasətçilər mövcud olarsa, idmanın və ölkənin inkişafı çətinləşəcək. Həmin sözlərim təsadüfi deyildi və sonradan baş verənlər bunu tam təsdiqlədi.
44 günlük Vətən müharibəsi haqqında nə deyə bilərsiniz?
44 günlük Vətən müharibəsində canından keçən bütün şəhidlərimizə Allahdan rəhmət diləyirəm. Onlar bu torpağın səmasında ulduz tək parlayan qəhrəmanlardır.
Qazilərimizə isə dərin minnətdarlığımız var. Onların iradəsi və cəsarəti bizim bayrağımız qədər müqəddəsdir.
Şuşa sizin üçün nə ifadə edir?
Mən, Qarabağın qurucusu Pənahəli xanın nəslindən gələn bir insan olaraq, Şuşanın adını daşımağı yalnız vəzifə kimi yox, mənəvi borc və atalarımızdan qalan müqəddəs miras kimi qəbul edirəm. Şuşa mənim üçün yalnız şəhər deyil — kimliyimdir, ruhumdur, kökümün səsidir.
Şuşa ilə bağlı təxribatlar haqqında nə deyə bilərsiniz?
Bəzi dairələr, xüsusilə xaricdə fəaliyyət göstərən erməni lobbi qrupları, “Şuşa” adı altında iki komanda yaratmaq, Krasnodarda maliyyələşdirilən layihələr həyata keçirmək istəyirlər. Bunlar tarixi saxtalaşdırmaq cəhdləridir.
Amma bilməlidirlər ki:
Şuşanın adını kağızlarda yazmaqla Şuşa olmaq olmaz.
Şuşa — əcdadın nəfəsi, şəhidin qanı, xalqın ruhudur. Bu ruh yalnız Azərbaycandadır.
Futbolun əhəmiyyəti nədir?
Biz futbolu təsadüfi sahə kimi görmürük.
Əgər futbol klubları olmasa:
gənclərimiz məhəllə künclərində pis vərdişlərə meyl edəcək,
ziyanlı mühit onları özünə çəkəcək,
sağlam düşüncə formalaşmayacaq.
Futbol meydanı uşaqlarımızı qoruyan bir qaladır. Biz idmançı yox, sağlam nəsil yetişdiririk.
Şuşa PFK-nın gələcəyi haqqında nə düşünürsünüz?
Tezliklə Şuşa PFK-nın böyük komandasını 1-ci Liqada görəcəksiniz. Bu yol asan olmadı, maneələr çox oldu, amma iradəmiz bundan güclü oldu. Biz yalnız komanda yaratmırıq — Şuşanın yenidən dirilişini qururuq.
Son sözünüz nədir?
Bütün dünyaya bir daha bəyan edirəm:
Şuşa bizimdir. Bizim olub, bizimdir və həmişə bizim qalacaq.
Azərbaycan Prezidenti cənab İlham Əliyevin dediyi kimi:
“Şuşa dirçəlir, Şuşa ayaqdadır, Şuşa yaşayır.”
Minnətdaram. Sağ olun, var olun.
Söztv.az
