Rusiyanın Novosibirsk şəhərində sadə yükdaşıyan işləyən Azərbaycan vətəndaşı Rza Rzayev yerli istilik sisteminin partlaması və qaynar suyun fontan vurması zamanı həyatını riskə ataraq, köməksiz vəziyyətdə qalan uşaqları və qocaları xilas edib. Rza Rzayev sakinlərin ona minnətdarlıq əlaməti olaraq topladıqları 71524 rubl (təxminən 1380 manat) vəsaiti sağlamlıq imkanları məhdud uşaqların ehtiyacları üçün bağışlamaq qərarına gəlib.
Kult.az xəbər verir ki, bu barədə tarixçi alim Zaur Əliyev qeyd edib.
“Novosibirskdən olan Aleksandr Oşçepkov onun insanları xilas etməsi zamanı fotosunu çəkib və bu foto ilə Andrey Stenin adına X Beynəlxalq Fotojurnalistika Müsabiqəsinin “Dövrümüzün Qəhrəmanı” nominasiyasında qalibi olub.
Rusiyada bu cür insanların sayı yüzlərlədir. Təkcə Rusiyada yox, dünyanın bir çox ölkəsində xalq qəhrəmanı olan azərbaycanlılar barədə mediada kifayət qədər məlumat var”, – o bildirib.
